大湯（おおゆ） 地標，幾乎所有人都喺門口留倩影。 地方大，乾淨夠光猛，入面有兩個池(基本上其他溫泉都係得一個池)，一個超熱一個冇咁熱，不過sorry呀，冇咁熱果個已經夠晒熱，果陣仲要冇加凍水，問你死未?! 而另外果個真係好鬼熱，D嬸嬸婆婆真係好野，喺冇加凍水既情況下浸呀浸，我只係因為想咩都試下，結果浸左唔夠半分鐘真係頂唔順，上水。 大湯有度唔好就係位置太方便又好出名，所以好多人去，出出入入，即使唔係去浸都有成日有人八卦打開門探頭。所以只去過兩次，同埋好夜先去，避開繁忙時間，因為唔想做snow monkey~(有個地方既泉水專係比馬騮浸，已成景點) 最初以為大湯最大，點知好似有個大過佢。 河原湯（かわはらゆ） 位置方便，好近大湯，30秒左右。我為此常客之一，乾淨光猛，水熱，正。 麻釜の湯（あさがまのゆ） 常客之一，D水時熱時唔熱，可能比人加左工，地都乾既。 上寺湯（かみてらゆ） 常客之一，水不太熱，都光猛。 熊の手洗湯（くまのてあらゆ） 常客之一，兩個池，地濕，大霧。 真湯（しんゆ） 我浸果日D水粉藍色，濁到見唔到個身，地方乾淨但水唔熱。 松葉の湯（まつばのゆ） 聽聞成日有人排隊浸，我果日去人都好多，但地方又唔大，水又唔夠熱... 滝の湯（たきのゆ） 離中央巴士站好遠又要上斜，地方同個池超細，浸果日D水係綠色，水夠熱。 横落の湯（よこちのゆ） 好近中央巴士站，D野分開擺，放好衫再打開玻璃門先入去浸，唔錯。 出面有瓦遮頭，避雨一流。(宜，押韻既) 十王堂の湯（じゅうおうどうのゆ） 池算大，乾淨，大霧，水幾熱。 中尾の湯（なかおのゆ） 離中央巴士站頗遠，地方大，好似同大湯差唔多咁，池一大一細，水超熱，果日好似搵唔到水龍頭加凍水，頂唔順，但整體唔錯... 新田の湯（しんでんのゆ） 我去果日水溫剛好，乾淨，水清，D野分開擺。 秋葉の湯（あきはのゆ） Oh~ 就係冇浸過呢個... 各溫泉外觀及內貌，詳情請自行到以下網路瀏覽 http://nozawakanko.jp/spa/sotoyu.php 雖然話係免費，但佢每個門口都有個賽錢箱比你去捐錢，作為維持溫泉既基本運作。 壓軸推介：麻釜温泉公園「ふるさとの湯」 http://www.nozawakanko.jp/spa/furusato.php 入浴費¥500，不過有coupon就¥400，如果係野沢居民就¥300。不過無論¥300定¥500，我都好推薦大家試試呢個溫泉。兩個室內一個戶外池，可能已經慣左咩都要自己帶，所以呢度有洗頭水淋浴液，又有花灑比你沖涼有櫈仔比你坐，就覺得呢度真係超級正。佢每逢星期四休息，唔知之後係咪都一樣。 其實野沢唔大，圍住條最旺既街行一圈都唔駛30分鐘，話遠其實都唔係太遠家咋，所以有機會就行下浸下啦啦啦~ 野沢分享全完。
