9月19日, 是我既正日生日 好多謝朗豪坊送左尼個生日禮物俾我 海洋公園哈佬喂優先場~ 好準時咁五點半就到左門口, (呢個門口我好似第一次黎~ ) 攞左兩條手帶, 全晚都靠佢架啦~ 趁仲早有D光，影下相先~ 本黎一入去就有四個哈佬喂屋, 點知白白痴痴咁坐左海洋列車上左山頂 咁一於由山頂玩落黎先啦~ 第一個玩既係潛行魔術屍~ 唔知係咪第一個玩既鬼屋，心情特別興奮，仲特別驚~ 成程都企係老公後面唔敢睇，差D連老公件衫都扯爛。 好開心又見到另一個BLOGGER 小魔怪 呢兩個星期見左佢好多次啦~真係有緣, 咁有緣, 影返張相先啦~ 第二個玩既係黑暗末世紀 因為仲好早，所以基本上都唔係好使排隊。(睇下後面無人架~ ) 呢個黑暗末世紀真係好黑暗, 有一段路係全程黑到咩都睇唔到~ 要伸隻手出黎拉住條繩行，真係驚上加驚~ 玩完叫完出黎，見到好多潮鬼，影番張相先啦~ 第三站就是去左天藏異域 呢度唔算好驚，不過有好多西藏既地方色彩，好似去左西藏旅行咁 有隻鬼仲叫我老公要攬實我先俾我地走，好搞笑~ 玩完西藏落番去樹林, 見到呢隻樹妖傻下傻下咁行 有個軍人鬼要射我, 隻樹妖仲企係我前面保護我, 好開心呀 對我咁好, 當然要同佢影番張相留念啦~ 香港靈異禁區係全部鬼屋最短既一個, 但對我黎講亦是最恐佈既一個 因為, 佢所有既佈境都係圍繞你身邊既地方 有公屋鐵閘, 有公廁 (真係有臭味架), 仲有碌架床~ 玩完之後返屋企, 真係有D寒架~ 落到山腳, 諗住去冥婚大殿, 點知見到"連卡佛"係度接受訪問, 要DELAY一陣先開得~ 如果見到聖羅蘭就好啦~ 呢個時候, 梗係搵隻新婚鬼影下相先啦~ 因為鬼魅冥婚大殿要係分開男同女行架, 我得一個人, 仲要行最尾 驚到咩都唔記得影呀~ 出番黎見到老公，真係一身汗~ 繼續再一站就係古墓凶靈 呢個係排得最耐既一個鬼屋, 因為佢要分開幾個幾個咁玩 仲有D高科技既野玩, 玩完一輪先至開始入古墓。 所以都排左成半個鐘呀, 我估正式時可能排得仲耐。 好彩排隊時都有D SHOW睇下, 又有D潮鬼出黎玩下，都排得幾開心既~ 係咪好鬼異呢~ 行番落去，就係YAHOO 呈獻既 5D地獄不歸路~ 呢個有好多新既科技, 至於點5D, 就等大家親身體驗下啦~ 不過生日流流要3鞠躬, 真係有D大吉~ 最後一個, 就係全院嚇滿~ 係老大街既一間舊戲院, 附近所有既環境都好相襯。 一入黎已經好似時光倒流咁~ 我最LIKE就係同尼D咁靚既靚鬼影相架啦~ 今日係優先場, 我地又早到, 所以好多鬼屋都唔使排好耐 係夜左之後先至開始多人, 開始要排隊。 今夜真係好開心，可以玩哂8個鬼屋 今個生日，真係超級難忘呀 多謝朗豪坊~ 如要聯絡本人，請電郵至 smonkichi@hotmail.com
