最近潮流都在懷舊，舊的衫，舊的地方，甚至連歌都唱十年前舊的人~XD 講到懷舊，又點少得80年代好流行的LIVE BAND 港式西餐廳~ 唔知睇緊文既你有冇去過呢~HAHA 其實呢D西餐廳真係買少見少 成個台咁多位，加幾張枱做生意仲好啦~ 所以真係要本身對音樂有熱誠的人先會維持到落去~ 今次就去到太子同旺角交界既 THE LIVE HOUSE 老實講，要係旺角地帶去呢D咁既黑媽媽地方 仲要落地庫，真係唔係個個敢入去架~ 好彩今次有人介紹過，當然無有怕，拖老攜囡一齊去懷緬下先~ 呢度要排一條長長的樓梯，兩邊都放滿哂D黑膠碟，擺到明主題同音樂有關啦~ 尼D攞設，用色，真係好80年代呀，突然諗起 "飛圖"年代~XD 落到去，長長的餐廳後有個放滿架生的舞台 90後OR 00 後們，有冇見過呀？ 見到頭頂上一排排的射燈，就知呢度係幾咁專業啦~ 我諗佢係80年代應該都曾煇煌一時架 (走個時見到牆上貼左好多老闆同舊日明星既合照架~XD) 呢度有2人餐同4人餐 價錢都可以 不過另外加錢升級的價錢就唔平囉~ 除左餐外，其實佢都有PIZZA, 主菜等，都係AROUND 百多蚊度一個~ 呢度係酒吧咁既格局，當然都有唔少酒類供應啦~ 因為懶得諗，叫左個2人餐算~XD 2個湯，一個係是日例湯既磨菇湯， 一個加左28蚊轉左個酥皮海鮮湯 本黎呢D港式西餐廳，湯都唔會好認真對待 不過，呢個磨菇湯真係喜出望外 好多磨菇粒，菇味好香，湯底都濃郁，唔係水旺旺個隻~ 酥皮海鮮湯都好多料，魷魚圈都有幾條，仲有大量蜆肉 不過個白湯我就麻麻，都係磨菇湯對胃D~ 特別要一提跟湯送既呢2枝餅干條 除左外型得意外， 估唔到佢係超級鬆化(平時個D通常都係實到鬼咁) 待應姐姐因為人太多差D唔記得俾我，好彩問佢攞番~XD 阿囡超級鐘意食，一個人食哂2條~@@ (俾我試左一啖就搶番~T.T) 2人餐其實有D咩呢？ 包2個湯，2個前菜，2個主菜，2個甜品同2杯飲品 前菜試左蜜糖雞翼配豬仔骨 蜜糖雞翼的蜜糖脆皮超級正，甜甜地又脆脆地 不過D雞肉就真係完全無味~ 豬仔骨肉唔太多，不過燒得好香，比想像中出色 不過個PAT BBQ 醬錯哂~@@ 破壞左豬仔骨的香味，仲搞到難食左~ 另一個係新奇前菜是炸車打芝士釀青椒 呢個小食真係第一次食XD 幾有創意 車打芝士幾濃郁，不過配落青椒度覺得有D少怪，好似中西合壁咁~ 不過最唔掂係個外皮硬到鬼咁~@@ 點解要整到咁硬呢~HAHA 呢D前菜全部都係煎炸，用黎飲酒個時食就一流了~ 平時跟餐飲通常都係咖啡奶茶，檸茶 呢度跟餐就只有青蘋果紅茶 （熱／凍） 如果改其他野品，要半價，唔平呀，所以我試哂熱同凍算~XD 對呢杯野既期望真係唔會大 (係酒廊飲青蘋果紅茶，個感覺都幾搞笑) 總結係熱比凍好飲好多，熱有香味，凍就咩都無，仲因為加左冰淡左好多添~ 我地既主菜黎啦~ 主菜，可以用抵食夾大件黎形容~ 香煎龍脷柳配黑松露汁 龍脷柳有2大件不單止，下面仲有一大埋薯蓉呀~ 龍脷柳一面煎得都好香口，一面好滑 唯獨那個汁太多，好快就龍脷柳整淋哂~ 建議個汁分開上好D~ 另一個香煎西班牙黑毛豬 真係超值，抵食 個豬扒厚到呢~ 2吋幾3吋都可能有~ 雖然咁厚，但都煎到熟而唔韌~ 當然，少少嚡都好難避免 不過以呢個價錢食到咁大份量的黑毛豬真係抵到爛喎~ 跟餐的是日甜品是雪糕泡芙ONLY 見隔離枱個甜品咁正，加 48蚊就加啦~ 呢個叫做"心太軟"的甜品 係一個雪糕火山咁，用鐵板上架 上到枱後倒D朱古力漿落去就好炸炸聲，好似火山爆發咁，好得意呀~XD 其實佢下面係一個實心的朱古力蛋糕，唔係真係心太軟會流出黎個D~ 不過呢個雪糕蛋糕加鐵板，正~ 唔好以為呢度個台係假架~ 八點開始，真係有真人表演~ 由一男一女兩位 合唱，獨唱，唱到九點，真係唱足一個鐘 D歌都好新架 (你唔係真係諗住唱80年代D歌呀~HAHA~ 連羅生門都有唱呀~ 阿囡聽到好投入~ 搖哂頭XD 呢度唔同酒吧，每次唱完聽眾都會拍手掌，幾有氣氛 不過唱緊歌時當然大家都會高談闊論啦，始終唔係去聽演唱會嘛~ 不過一樣聽住歌一路食野，又別有一番風味~ 老實講，呢度既食物水準普通 不過如果想懷緬下又或者黎朝聖下呢D過去既年代都幾好架 香港的特色小店，真係要靠大家維持落去呀~ 我怕好快香港只會得番大商場，連鎖店架咋~ The Live House 旺角彌敦道731號地庫 tel : 2392 1181 如要聯絡本人，請電郵至： smonkichi@hotmail.com Fanpge : www.facebook.com/smonkich Instagram : https://instagram.com/smonkichi/ Blog Link : The Ztyle Beauty Qooza She.com U Beauty Beautylife Blogspot BE We Share
