呢幾個星期日都係拜山日 黎到第三個星期，要到我老爺奶奶個邊拜啦~ 拜完山一家人食飯，揀左近老爺奶奶屋企附近的一間餐廳 滋味廚房 Namaste Kitchen 睇面門，覺得佢好似街坊廚房 比茶記貴少少的西餐廳咁~ 但其實，佢係食印度，尼泊爾菜架~ 而且，幫襯既, 好多都係外藉人士，反而無乜香港人~XD 餐版有中英對照，仲有相添，對於唔太熟悉既菜系，有相真係好有幫助~XD 價錢都係幾十蚊一款，真係幾街坊價錢喎~XD 坐低後，黎個免費的胡椒餅同醬汁～ 青色的薄荷醬很清新，食食下都開始有少辣，是我鐘意既味道 另一款就少少辣，少少甜~ LASSI (印度乳酪) 方面 ，阿囡當然要佢至愛既士多啤梨啦~ ( 不過LASSI有士多啤梨味又真係少見D喎~) 味道唔太甜，亦唔太人工味，唔錯~ (不過阿囡飲完就咳左一個星期~ 真係要戒凍飲啦囡~ >< ) 奶奶要左杯SALTY LASSI, 真係幾SALTY~, 感覺好似重手左少少，姑姐叫左杯MANGO LASSI, 嘩~~ 甜到呢~~ 今次阿囡揀既最好味~XD 我地每人揀左一個菜 (落哂ORDER先要原來有2人SET ~＠＠） 姑姐點既雜菜咖哩角~ 共有四隻~ 雜菜就真係唔覺，反而成隻都係薯仔多。咖哩薯仔幾香，不過個皮有D厚，好鬼飽~ XD 奶奶點左個尼泊爾酸辣湯，好多香料，同平時飲既中式或泰式酸辣湯好唔同~ 我就唔覺似酸辣湯，有D似即食麵湯底~XD 呢個湯真係好個人口味，我同奶奶都覺得好味，每人KO左半碗。老爺同姑姐就覺得味道有奇怪~ 唔太LIKE~ 基本上，今晚係個全羊宴，因為之後個幾味全部都係羊~XD 呢個尼泊爾烤羊肉超正呀~ 用鐵板上，一上黎已聞到個陣香味~ 因為係烤羊肉，羊肉之前已烤到干身，比平時食的羊肉要香~ 羊肉好淋，但唔係爛肉個隻，仲有D咬口~ 唔知邊個點左呢個串燒羊肉卷~ (好似係我老公XD) 開始以為係一串串既燒羊肉~ 點知原來又係呢個卷~@@ 上次係北角食過一次已覺得麻麻今次呢個仲衰~ >< D肉好似膠咁~ 超奇怪~食落唔似食肉，似食假肉~XD 再黎就係乾燒羊肉同鑊仔咖哩羊肉~ 呢兩個就正常好多，亦都好味好多~ 乾燒羊肉 (左) 辣味勁D，鑊仔咖哩羊肉就甜D 羊肉比起鐵板既更淋。而且都好入味~可能有汁煮既關係。 2者其實都唔太辣，奶奶食唔到辣都接受到~ 阿囡當然唔得啦~XD 但兩隻汁都幾易入口同接受。 食咖啡，當然要食烤餅同飯啦~~ 烤餅叫左洋蒽烤餅 (上) 同芝士烤餅 洋蒽烤餅睇個樣都覺得似蒽烤餅多D 芝士烤餅相比起來就比較熟身D，芝士味唔太重但就索汁勁D~ 再黎呢個印度飯~ 30蚊一個，開頭問待應有幾多，碗上定碟上，佢都唔係好識答，諗左一陣先答係碗~ 原來2樣都唔係，係桶上~XD 呢個咁可愛既桶仔，即係要為個飯加分啦~ 望落細細個，但份量一D都唔細架~ (我地5大1小 都係勉強先食得哂~@@) 飯係好正宗既印度飯，尖尖長長，而且勁輕身，畢落去個下如無物~ 好得意~ 阿囡都話好味，食唔少~ (佢係淨食白飯~HAHA) 用黎伴咖哩食當然一流，因為干身，索哂D咖啡汁，正~ 第一次食尼泊爾菜，其實真係唔太識同印度既分別 感覺尼泊爾多烤肉，先烤後加味。印度就直接將D肉放入香料煮 但兩者其實都唔係好辣個D，味道都好相似。 呢度既服務都好好，好細心。 可能夜晚人不太多，待應都有求必應 個女廁超大，仲點哂香薰，要加分加分呀~ 呢間餐廳鄰近上環文娛中心，下次黎睇話劇可以再黎試下佢既2人餐喎~ 滋味廚房 Namaste Kitchen 上環皇后大道西38號地下 如要聯絡本人，請電郵至： smonkichi@hotmail.com Fanpge : www.facebook.com/smonkich Instagram : https://instagram.com/smonkichi/ My Blog Link : The Ztyle Beauty Qooza She.com U Beauty Blogspot BE We Share
