如果你每日只有1000個卡路里嘅quota，而你早餐已經食咗300、晏晝又食咗400、咁去到夜晚食得啲咩好呢？ 介紹三款我嘅瘋狂晚餐預算！我今個星期就已經食咗其中兩款啦～ 真係咁食法都無肥喎！ 1. 牛奶公司芒果雪糕 真係唔講得笑！減肥真係可以食雪糕？ 無錯啊！減肥真係可以照樣食雪糕！不過就最緊要睇清楚你食緊嘅雪糕係有幾多個卡路里! 好似我今晚揀咗呢一款芒果雪糕係牛奶公司嘅，食晒成杯都不過係135個卡路里！相比起其他牌子拎上手都過200kcal！呢款可以話係非常之抵食～ 哈哈！不過話晒都係雪糕，我就唔建議大家食多過一杯做晚餐～ 2. Hot Mocha 之前我喺「出街食飯冇無難度」介紹過去Starbucks可以食Bagel 當一餐，嗰陣時建議大家可以飲美式咖啡。咁如果唔想食包淨係想飲杯嘢當一餐嘅話我會建議大家飲返杯甜甜地又可以頂肚嘅Hot Mocha 啦～ 一杯Hot Mocha with Whole Milk就有290個卡路里；如果係 skim milk嘅話就有220個卡路里；而Soya Milk 就係240 個卡路里。我個人喜歡飲豆奶（Soya Milk), 貪佢香濃一啲，而且又夠飽肚！ 3. 生菜魚肉 如果好想食街邊嘢但又唔夠quota嘅時候，最好就係食碗生菜魚肉！ 佢嘅卡路里大約係260，如果真係驚唔夠飽建議你可以食多個蘋果，咁就啱啱好啦！ 今日介紹呢三款的確係有d瘋狂，因為通常大家都無諗過係可以當晚餐食！而我嘅經驗係，早餐要食飽d, 午餐正常食，晚餐就要食最少～ 咁就會落磅快一d! 但切忌唔食嘢！ 希望我既分享可以鼓勵到你 - 記住1>0，如果你想同我交流更多減肥心得，歡迎你add 我 fb: Smarty Ho Yin!
