以前晚晚唔係要OT就係放工之後仲要趕住返學，所以基本上一日三餐都係要出街食。加上個時份工好大壓力，變左成日比左個藉口自己，返工已經咁辛苦，放工梗係要食下嘢獎勵下自己!! 就係咁…我試過夜媽媽走去啪個乾炒牛河! 又經常放工係街食完10粒魚肉燒賣再返屋企食飯! 就算後來換左份工無咁忙，咪又係要放工趕去做facial、shopping、整指甲，所以要徹底解決問題，我一定要有一套出街食飯晚低卡menu! 今日就先同大家分享幾款總有一間係附近兼且食得飽既外出用膳低卡一人前～ 1. Bagel - Starbucks/ Pacific Coffee / Mc Cafe 以前真係好憎食麵包，又乾又硬，但係打從作戰一開始，我就嘗試早餐食下多士。食食下就發覺其實又幾好！講返呢個Bagel先，優點在於夠方便去到邊都食得到，而且仲係全日供應！（Starbucks 有時無擺出嚟，要直接問落單同事講話要Bagel佢地就會去睇仲有無～）通常Bagel 都會跟粒Cream Cheese...起初我都以為呢粒嘢食唔食得呀？會唔會係陷阱嚟呢？ 後來睇過原來呢粒嘢只不過係 70kcal. 而Bagel 就大約係270 kcal. 哈哈~ 差d 唔記得講呢個重點: 食Bagel 就唔好諗住再加杯Mocha 或者Cappuccino啦!! 2. 韮菜雞肉米線(少辣少米線）- 譚仔/譚仔三哥 好多時候放工跟住要返學或者做運動，食得太少個人又會軟手軟腳，所以一定要比自己食d熱嘢，食米線就夠曬方便! 除左韮菜同雞肉之外，都仲可以選擇魚旦、牛丸、火腿、竹笙、金菇、肉片等… 但千祈唔好一次過叫曬全部喎~ (通常我都係一份菜一份肉! 或者再激D兩份菜!) 無錯，食辣係會高卡一d，但無計… 我鍾意食! 所以無論點我都係會叫少少辣! 至於嘢飲呢~ 可以飲熱檸或熱齋啡! 3. 魚柳包 – McDonald 有時如果得返15分鐘食野或者想簡簡單單食個包，我就一定會睇下附近有無麥記! 好多人都以為食麥記就一定等同食邪惡嘢，但其實只要你識得揀，麥記絶對係減肥人士既好朋友。相比起440 Kcal既豬柳蛋漢堡，魚柳包就更抵食，只係362 Kcal (連醬)。而且仲可以飲zero可樂或者我既至愛 – 熱即磨齋啡!!! 今次就同大家分享住咁多先… 下集再續! (P.S: 早兩日見到一日到黑… 既人氣破萬實在好滾動，多謝大家既支持~ 都係個句，只要唔放棄，每個人都會有華麗轉身既一日!!!) 如果大家想知道更多減肥、扮靚、行街買衫、健康飲食、四圍去玩既資訊，歡迎你add 我 facebook: Smarty Ho Yin
