上回講到唔睇唔知卡數高，一睇竟然發現原來好多我既「飛佛」都係非~常~邪~惡~! 但係實際執行上又真係好難一下子全部戒曬唔食。因為食好嘢自古就係人類既天性! 哈~ 於是，我就幫自己做左一個食物分類系統! 第一類：自願放棄進口食物 （直至大業得成之日）: 午餐肉、腸仔、貢丸、公仔麵、乾炒牛河、星洲炒米… 講到戒口呢樣野真係要好小心，往往自己話唔食就好地地; 但係如果係人地話比你知你一定唔可以食，通常只有兩個反應: (一) 聲大大咁話返人地:「點解唔食得啫? 呀邊個邊個夠成日食啦… 又唔見人地肥? 」 (二) 化身悲劇男、女主角: 「呢樣又唔食得，個樣又唔食得… 真係生無可戀啦~ 鳴…鳴…鳴… 」 唉~ 我肥過，我梗係一同二都試過啦! 第二類：控制進口數量食物: 燒肉飯、炸子雞、咖喱牛腩飯、Tiramisu、蝦條… (基本上所有食物只要控制好入口份量就咩都可以食… 是真的!) 秘訣1. 少飯、少飯、少飯: 由於自少屋企教要有衣食，永遠人地比幾多我就食幾多! 所以，第一件事記得係落order時講明少飯。有時，我仲會話兩啖飯呀! 唔該~ 秘訣2.開心share: 食之前問下其他同事/ 朋友，你地要唔要試下? 請人食或者先分走一部分都係可以減少食多左既方法。 秘訣3.自備食物盒: 如果無人同你share就最好自己先pack起一半留返下餐食啦! 又甚至有時我買外賣都會特登叫人用細盒幫我裝! (或者有人會問咁你咪好蝕? 比正價錢但又叫人用細盒裝! 減肥期間，請暫時擺低呢種“咁咪好蝕底”既感覺! 試諗諗，你食曬真係無蝕底，但會肥! 咁你仲食唔食… 秘訣4. 記憶味道：薯片同甜品之類的食物每次食之前我都會問自己係咪真係有需要食？真係好想食同埋仲記唔記得係咩味之類的問題...諗清諗楚，要食就比自己開開心心咁食！ 第三類：鼓勵進口食物: 蘋果、金菇、芋絲、低卡芝士、多士、雞胸肉、白魚旦、烚蛋白、米粉… 講真，以上提到既嘢食有一半我都係因為要減肥先同佢地做朋友，但係識落 (食落)又真係覺得佢地係好嘢。後來我仲用佢地嚟自創左好多其他菜式! 希望我既分享可以鼓勵到你啦，記住1>0 ! 如果你想同我交流更多減肥心得，歡迎你add 我 fb: Smarty Ho Yin!
