話咁快又過聖誕，補祝番一句各網友聖誕快樂，新年進步先﹗ 呢個聖誕難得兩日假，當然不會留在香港，以往每年都同食家去澳門飲飲食食，今年搞搞新意，上深圳南澳玩番兩日﹗ 由於未去過關係，初頭對呢個地方都幾陌生，網上資料亦都不多，估唔到其實都唔算太難去到﹗ 我地一行八人，先在永東買車飛，粉嶺到南澳位位$60，到達後可以在下車的旅行社再叫佢幫手call車，$60包車可坐四人，咁就去到我地既目的地..... 南澳東沖，我地今次住既酒店係在東沖海灘旁既新豪方東沖酒店﹗ 我地揀既係最貴既獨立木屋，一人一層﹗ 房間也很整潔，應有的都有﹗ 最正係房間對住海灘，景色十分怡人，三步就可以衝落去海灘﹗我倆感到十分滿意﹗ 東沖最出名是玩水上活動同埋露營，冬天得十度八度當然無人來啦，所以我地呢次淡季來都好尷尬，就係酒店門外咩都無開，士多得一兩間，想搵食十分之難，只有在酒店吃個杯麵當午餐啦﹗ 來東沖有一個原因，就係為咗呢間在海邊的木屋燒烤﹗ 有留意我介紹既朋友都知我最愛是木屋燒烤，曾許下誓言希望可以去哂佢所有分店。 這間東沖木屋是我最想去的地方，因就在海邊露天風景極度優美﹗ 唔係講笑架，環境真係好靚，旁邊就是湖，風景是一百分的﹗ 嗱，中間的湖景真的不得了﹗ 係咪好正？正到我影相都有點手震了﹗ 這間木屋過癮之處除了風景一流外，其次是自己燒烤的﹗ 好似$368一個10人餐，都係肉肉丸丸腸腸之流﹗8個人夠哂食﹗ 每檯開爐要$60人仔，就係咁我地就燒燒燒喇﹗ 海邊的涼風吹上，十分舒適﹗ 不過講番食物，這兒的選擇不多，無海鮮，只有簡單的肉串蔬菜及丸類。 而最重要既係我地已經用哂佢既調味，但係都無人整得咁好食，哈﹗ 食物雖然一般，但有驚喜的是，這兒有得唱卡拉OK﹗木屋都有得唱卡拉OK真係聞所未聞﹗ $100一小時，唱兩個鐘送一個鐘，由於全場零人次關係，我地講價竟然可以講到$80粒鐘﹗ 就這樣，我地就係咁唱唱唱，飲飲飲，飲飽食醉仲要返到酒店再飲過，這一夜我又醉了﹗ 瞓醒起身，驚見我個露台成地都係青島樽，到底尋晚發生咩事？我自己真係唔記得了﹗ 起身由於頭又暈，宿醉未醒又肚飽關係，去左酒店既酒樓食早餐﹗ 估唔到幾好食，價錢又唔貴﹗這一味是土豆絲﹗ 楊州炒飯也炒得乾身好吃，美妙﹗ 吃罷早餐再休息一陣退房，我地便又call番尋日的司機，車我地去南澳最出名的南澳海鮮街食海鮮餐作午餐﹗ 海鮮街沿著海邊有十幾廿間海鮮酒樓，間間都係門口放滿哂海鮮，你揀完就入去做加工﹗ 由於唔知頭唔知路關係，我地問司機邊間比較好，佢推介建華海鮮酒樓，話最經濟實惠，咁就一於試試佢啦﹗ 赤米唔係成日買到，這兒的$55人仔。 細細隻，蝦味濃甜，好吃﹗ 白灼螄蚶$50一斤﹗ 我真係唔太識欣賞，太腥了，但友人們就視之為山珍海錯，成碟食哂﹗ 花螺一斤$88﹗ 花螺味鮮最宜白灼﹗ 螺味極濃，滿是海水味，爽口彈牙，好好吃﹗ 扇貝$2一隻，大陸吃不到好的扇貝，隻隻都係細細粒的，變相是吃粉絲蒜蓉。 炒花甲好似$25吧，抵吃﹗ 這味醬爆游水墨魚極美妙，墨魚肉爽口彈牙，醬汁不會過濃搶去其鮮，個個都話好好味﹗ 海膽炒飯，$98﹗ 真係好多海膽粒架，仲要炒得好乾身，味道香濃啊﹗ 最後阿姐送多碟菜，八個人吃$550埋單，變相一人都唔洗$60，抵爆，司機無介紹錯呢﹗ 就在海鮮街旁，便是南澳海味街，入面賣的全是海味，乾貨等。 來南澳的旅行團是必遊的景點﹗就我睇，乾貨海味絕對比香港的街市便宜，好多阿姐都駐足慢慢揀﹗ 我地對海味就無咩興趣喇，不過都叫買左手信﹗ 就係魷魚絲，試食過味道不錯，$25竟然有一斤，大佬優之良品起碼$150，抵買﹗ 而南澳出產既紫菜亦都好出名，友人們都買了好幾餅呢﹗會來的朋友可以試吓﹗ 之後我地再call番司機車我地落福田$250人仔，算平了﹗ 亦都推介這個姓鍾的司機，都幾老實亦都有禮，如你地會去南澳想要車電話的話，可YahooBlog留email我send佢卡片給你吧﹗ 這就是我地聖誕南澳旅行團喇，整體來說真的不錯，一定會再來﹗ 多謝大家支持，又係那句，網誌十年才更新一次，搵我就add我Facebook啦，大家一齊飲飲食食﹗ https://www.facebook.com/#!/smallsmalllin 我的微博: http://weibo.com/smallsmalllin
