今次要介紹的是一間老店，我估在紅磡都應該開左廿年以上，就係蕪湖街嘅 一本鐵板燒 個名係咪好熟呢？我估去過紅磡既朋友都有留意過呢間日式居酒屋﹗ 其實細細個去紅磡已見到呢間野，初次吃反而是大學的年代，事隔十多年，近一兩個月再去，記憶中佢既食物竟然無咩加價﹗ 食物全部都是薄利多銷，即製壽司七蚊兩件，食物碟碟都係三四十蚊有交易。 今次介紹是街尾既新店，上次在老店吃時店員話做埋呢個月業主便要收鋪了，要吃就要去新鋪﹗ 三文魚腩刺身，油脂甘香軟滑，$60有半磅，如一次過order一磅才$100﹗ 北寄貝刺身一客六片，好像才$30﹗真係咁平邊到搵？ 識我既朋友都知，食店酒水對我最重要，可幸這兒除食物便宜外，酒水更加平到得人驚﹗ 大老青島只係$14支，呢個價錢大排檔都平唔過佢﹗當然係勁飲啦﹗ 如要喝清酒的話，最平既1.8公升既千賀壽只係$98，痴線Citysuper同酒鋪都仲要賣得貴過佢﹗ 不過明天要開工，今晚唔敢同食家暢飲，清酒易入口又快醉，都係放假先來片過﹗ 這兒也有存酒服務，飲唔哂留個電話下次來就俾番你，唔好以為咁鬼平就無好服務﹗ 炒雜菜﹗ 來這兒除了吃便宜的刺身壽司外，亦要一試佢既即叫即做鐵板燒﹗ 鐵板魷魚鬚香口美味﹗ 友人最愛係佢地既鐵板粟米，粟米甜牛油香，好吃﹗ 我唔食魚，鹽燒三文魚頭當然沒有我的份兒，不過食家同友人都話魚夠嫩燒得好味﹗ 牛肉煮大根，蘿蔔同牛腩炆得夠腍又入味，痴線價一大碗只係$8﹗ 友人是三文魚痴，又點多半磅三文魚腩﹗ 前面是象拔蚌刺身，這個就麻麻地，不推薦﹗ 我來這兒必一個人吃三碟以上的薄燒牛肉﹗ 薄薄的肥牛片在鐵板上輕烤數秒，再卷上大量蒜片及香蔥，在半生熟的狀態下上碟，這就是名物薄燒牛肉﹗ 半生熟牛肉香嫩，蒜片加蔥極香口，牛肉味濃郁，嗜牛嗜蒜者必吃﹗ 錫紙焗海鮮菇，菇甜牛油香﹗ 七味粉炸雞球，這個就嫌炸粉太厚了。 鐵板雞翼尖，是佐酒良物﹗ 總體來說食物均不錯，當真是價廉物美，三五知己來大吃大喝也不過是二百蚊有找﹗ 但當然，一分錢一分貨，刺身壽司不是會吃到呱呱聲的那種﹔燒物製作亦沒有出面的講究及變化，鐵板燒主要是用上蒜片、香蔥、牛油、海鹽及黑椒來調味，當然不能與坊間的正宗居酒屋相比，但來飲兩杯，搵食物佐佐酒傾下計，是大眾化的廉價選擇。 最後埋單成十支青島，兩支清酒，再加不知幾多樣食物，飲飽食醉每人才$180，故最近差不多隔個星期都與食家來吃，就昨晚所見，七點左右已全場爆滿，連吧枱都坐滿人就知這老店有不少捧場客，能在變遷中的紅磡生存廿年有多，總有原因吧﹗ 多謝大家支持，又係那句，網誌十年才更新一次，搵我就add我Facebook啦﹗ https://www.facebook.com/#!/smallsmalllin 我的微博: http://weibo.com/smallsmalllin
