2015年2月，當日本新聞台報導寒波襲到時，我人在名古屋的白川鄉，大雪到由白川鄉回名古屋的所有巴士停駛，差點要訓街....雖然此生未如此凍過，不過那裡的美同震撼真係好難忘，而且彷彿去左「阿信的故事」年代，曾是日劇迷的我好有情義結好感動好有畫面。 首先由名古屋去白川鄉的來回巴士飛和合掌屋的2日1夜住宿我是透過網上代訂的，因為想住進百年歷史的合掌屋，通常屋主都是當地老人家在經營，大部份只接受傳真或電話預訂，如果無當地識日文的人幫手，可能有點麻煩，所以我寧願比多少少錢，方便快捷唔洗煩。 由名古屋去白川鄉的車程約3小時左右，其實可以直接到名古屋名鐵巴士中心買車飛。那個巴士站都幾難搵，建議出發前一天去買車飛順便熟習下行去巴士站條路。 到左白川鄉巴士站，旁邊有information center可以入去拎資料拎地圖，如未買回程車票的人都可以響果度買左車票先。之後過一條吊橋就真正入左去合掌村入面。條吊橋都咪話唔恐怖.... 我住的是擁有400年歷史的合掌屋「利兵衛民宿」，雖然歷史悠久，但保養得很好，洗澡及廁所地方都是從新翻新，用現代花灑及廁所板，而且有暖氣又乾淨，房間的被鋪有電毯及暖水袋提供，實在舒服到朝早都起不來，但為了豐盛的早餐唯有爬起身，住宿費是包埋晚餐及早餐，所以每人9000YEN一晚我覺得勁抵勁值得 at least 住一晚 (而且我在市區的住宿都住平啲，為了balance返個旅費)。而且晚餐同早餐都好豐盛好美味，無可挑釁。可惜我沒有拍太多民宿的照片，只有圖下一張房間的相。 雖然有400年歷史但很乾淨好溫暖的二人房。由打開民宿門口開始，已經感受到好多溫暖，接待我們的是一位婆婆，為我們捧上熱茶及煎餅，每餐豐盛飯餸都由她準備。她盛給我們檯的飯煲足足有6碗飯甘多，我地只有2個人卻食清光(即係每人食左3碗飯)，每碟餸同飯後果我地都會乖乖食晒。唯一不便是隔音有點差，晚上睡覺完完整整聽到隔離房兩位日本女仔的對話，不幸地(?) 我地唔識聽日文所以唔明佢地講乜。 打開房間的窗就是以下的景 點擊圖片放大 點擊圖片放大 +2 啲雪厚到一般鞋係無辦法行走，幸好民宿有提供水BOOT。 由於當時太大雪，不能上山睇白川鄉的全景。臨近黃昏時，大雪到有點可怕，但我們還是在晚餐前走到小食亭買飛蟬牛肉同零食食。 點擊圖片放大 買緊野食時見到有日本學生著住裙，覺得好凍好辛苦。 開始入黑，越來越大雪，啲人開始返晒入民宿。好尊敬那些不斷清路上及屋頂積雪的人員。 這一家和田家，是開放給別人入去參觀，自江戶時代已存在的合掌屋。 第二天下午當我們去排隊等巴士時(因為車票是預訂的，所以沒有去Information center確認任何資料)。當我們等了又等，去其它目的地的巴士都走晒，成個巴士站都無人時，天又開始黑，又越來越大雪時，我地開始好驚，走去Information center問，先知去名古屋的巴士已全線停駛，剛好重有一架巴士去岐阜，我地到左岐阜可以再轉巴士返名古屋，於是乎立即refund返原本的名古屋巴士票，再從新買轉車巴士票搭車，先成功返到名古屋，真係好驚心動魄。 雖然因為呢一場大雪，令某些白川鄉的地方去唔到，例如上山睇全景，而且啲雪又厚到好多合掌屋被掩沒，但因此變得更加震撼同靚，而且現場睇係比相片更加懾人，畢生難忘!
