小時候跟爸媽旅行就試過，自已出錢出力帶媽媽旅行還是第1次，想說初試牛刀，去3日2夜旅行睇下自已頂唔頂得順先，媽媽又唔中意去農場又唔中意動物又怕污糟，去星加坡好似幾適合。雖然我已去過兩次，重發誓以後唔再去，但今次經地膽親友介紹，食到好多正野，之前只在旅遊區食過又貴又難食的餐廳，所以覺得新加坡又熱又無啖好食又無野玩好悶，但今趟旅行後真心改觀晒~~~ 詳細的餐廳推介可看要encore的【新加坡】美食：斯里蘭卡白胡椒蟹米粉湯、mocha咖啡排骨、中峇魯肉骨茶 酒店 我們住的是Nostalgia Hotel，酒店內有一個小小的泳池，而且酒店設計很復古又乾淨，樓下已有一堆早餐店，CAFE，FOOD MARKET，出名的肉骨茶及海南雞飯店，不遠處還有fairprice超市，我個人頗喜歡，不過它離最近的MRT要行9分鐘，步行去牛車水也要20分鐘。可能你覺得行9分鐘都幾近呀，但新加坡天氣實在好熱，平時少行路的人在新加坡要走9分鐘路都幾吃力。不過我們有4個人，而且怕媽媽太熱太累，所以我們大部份都搭的士為主。 交通 新加坡交通發達，MRT及巴士都去到好多景點，但我發現MRT出口永遠都離景點有一段距離，永遠要行到噴晒汗才去到想去的地方，而且MRT的每個出口都相距甚遠，明明香港比新加坡大，為什麼新加坡無論MRT站或商場都好像行到腳斷都未行到去終點??? 今趟旅行我們比較常搭的士，由機場返酒店，酒店去聖陶沙，酒店去機場都是搭的士。起錶是SGP3.9，1公里之後每400米跳SGP0.22。我覺得人多的話搭的士其實幾抵，好似我們機場返酒店大約搭左SGP26左右，車程35MINS左右。我還聽地膽親友教，好多的士入聖陶沙的賭場是免收費的，如果你本身試住搭的士入聖陶沙的環球影城或海洋館，可以試下搭的士時話要去賭場，在賭場落車後再行去環球影城，甘可能你會免左一程的士錢。(但我個人就未試過) 如果搭MRT，買車飛時要留意service counter只幫人增值，如果你係買車票，要去票機自已買，我初初見票機多人咪走去排service counter囉，好不容易排到我佢唔幫我買，叫我自已去票機買飛，勁無奈。 另外，UBER響新加坡都好普遍下，如果人太多擠不下一架TAXI可搭UBER，方便又便宜。 天氣 新加坡同泰國一樣1年365日都是夏天，但它們的熱跟香港不同，它們的熱是乾爽舒適的，唔似香港又焗又濕，夏天時日日都想中暑，所以基本上去新加坡一定是著背心或短就衫，出街一定要戴太陽眼鏡，因太陽太猛了，還有一定要搽防曬。 雖然我去果期正值寨卡病毒，但我地果3天完全無比蚊咬過，直程無見過蚊飛過，明明周街都是綠化樹木，可想而知新加坡衛生環境做得幾好，聽說寨卡病毒重災區在aljunied，離我們酒店很遠，我媽媽跟二個親友成個TRIP無噴過蚊怕水都無比蚊咬過，而我因為好惹蚊所以每天都有噴蚊怕水，當然都無比蚊咬過。 第一天 落機搭的士返到酒店已經成4PM，我們散步去左牛車水的佛牙寺，由酒店慢慢行左快30分鐘噴晒汗先行到去牛車水。 點擊圖片放大 行到甘上下就去左龍海鮮螃蟹王食飯。那個斯里蘭卡白胡椒蟹米粉湯真係不得了之甘好食，連湯都好鮮甜。睇返相都好想飛去再食過!!!! 黑椒蟹我麻麻，黑椒太濃蓋過左蟹的鮮味 呢個炸麥皮蝦都好正 第二天 在酒店樓下超美味的中峇魯肉骨茶做早餐就搭的士去海洋館 潮式凍食黃花魚無得輸，吱D檸檬汁點D豆鼓汁，好新鮮好清爽好好味，不過成港紙一舊水 在新加坡我們經常買薏米水或羅漢果水飲，好透心涼又消暑 海洋館門票是地膽親友一早幫我們在牛車水有間叫天宇旅游(Skyline)旅行社買的，Skyline買門票比其它地方便宜 我們買了COMBO 10, 海洋館加3D Museum。我覺得海洋館大人細路都岩去，諗唔到帶D長輩去邊就去海洋館實無死，而且新加坡海洋館是全球第2大哦。 有得親親海星，原來海星表面好似石頭甘硬。 呢D好似叫海蛇GE物體好核突好嘔心，我見到時尖叫左出黎 好大個魚缸好多魔鬼魚呀，坐響魚缸前好療癒呢~ 呢度D水母好多款好靚呀 見到DORY喎~ 行完海洋館和3D Art Museum後，行去馬來西亞美食街(就在環球影城旁邊)食午餐(其實已經接近下午茶時間)，響環球影城門口影下相就出返去Gardens by the Bay。因為想比媽媽體驗下搭MRT，所以回程時無搭的士，去左搭MRT。(講到好似英女皇出巡要體驗民生甘XD) 由聖陶沙去Gardens by the bay首先搭Santosa tram出返去 HarbourFront MRT站，再搭MRT去到China Town轉藍色線搭到去Bayfront站，然後睇路牌指示Gardens by the bay出就得，雖然要轉線有D煩，不過新加坡的MRT算清晰易搵路，只係要行幾遠下，好似尖咀地鐵站行去尖東站甘遠。 基本上響Gardens by the bay唔洗買票都可以響公園大部份範圍活動，如果你唔想行路，可以比錢坐果D公園車環園一週，不過我覺得一場黎到公園當然要散下步，行到累咪坐低休息下囉。 點擊圖片放大 我地響公園坐下HEA下食下雪糕，等接近7點才行去睇Wonder Full的夜燈及噴水表演，即係香港o既幻彩永香江D friend。在Gardens by the bay又是睇路牌向Marina Bay Sands方向走就可以。Wonder Full每晚8PM和9:30PM各有一場，我個人覺得無咩特別，反正免費，又可以坐在海旁吹下風，又近Gardens by the bay咪睇下囉 (步行過去6分鐘左右)。個WONDER FULL就係響下圖的位置表演家啦，大家都好早去霸靚位，搭正8點呢度係坐滿人。 睇完就搭的士去Jumbo Seafood食晚飯。最爆冷又驚喜的一道菜是摩卡排骨，好香咖啡味好好食。 食完飯我比媽媽他們揀搭的士或沿住條河行30分鐘返酒店，佢地揀左散步既，沿住river晚上散步真的好好好舒服呀，是香港不能感受的清爽涼風及寧靜。 第三天 坐的士去亞坤多士食早餐再行去魚尾獅，影D最老土的遊客照 跟住行去Telok Ayer Market類似food court甘GE市集食LUNCH (由魚尾獅行過去11分鐘左右)，果度無冷氣只有風扇，公主媽媽稍有微言，但我地勸說要學習適應下當地人的習慣，有D著老西的上班族都滴住汗響度食LUNCH家啦，係香港人先嘆慣冷機啫。 食完lunch就搭的士去機場了。 雖然短短三天，但成個導遊甘要安排所有行程，照顧每一個不同性格的長輩的需要，又不能讓他們覺得行程太無聊又不能讓他們太累，(我)真心疲累，不過家族旅行so far是開心的，看到他們比自已更有童真，對旅行的好奇程度，讓我好想帶家人去更多地方，聽到佢地話下次都要自由行，不要再跟團旅行了，無甘好玩，雖然有D汗顏不過有暗爽到，最緊要佢地覺得開心麻，黎緊要安排多D家族旅行呢~
