年中時 家姐叫我同埋佢D同事一齊去工聯會學煮餸 哈哈哈 眨下眼幾個月 上一個越南菜完左 我地跟住同一個師傅黎多個Course 今次學既野比較簡單 不過我被下一堂既酸辣凍鳳爪吸引住 勁期待呀!! **************************************************************************************** 見臨近聖誕 剛剛學左依個蒜蓉焗青口真係勁易整呀 (哈哈 易到其實唔係好駛出去學~~) 材料: 紐西蘭青口一磅, 安佳鹹味牛油, 蒜茸4両, 煙肉2両, 少許蔥 先用熱水熱溶D牛油 蔥唔駛咁多既兩條左右啦 切粒粒 煙肉又係切粒粒 出去跟上堂最好其實係佢會教你用刀法 跟住蒜茸就好玩喇 先用紙巾包到實D蒜茸 真係要包到厚一厚架 跟住用依個搥仔中呀中呀中 中到佢溶溶爛爛 真係洩憤既好幫手呀 我就一路中一路諗住D黑警 中到大概係咁就差不多喇 唔好以為收得工呀 仲要用刀切粒粒架 咁樣先收貨既 青口呢 先解凍 然後再用水焯一焯 差不預備好哂!D材料喇 切工完成 點都要煮少少野既 將D煙肉丁落鑊兜一兜 加兩圈紹酒抄 炒好之後 將蔥同埋蒜茸撈埋一齊 再加 1/3茶匙鹽, 1/3茶匙雞粉, 1/2茶匙糖, 1 茶匙麻油 落哂料後加牛油 差不多係1:1 將牛油加到蓋注哂所有材料 然後將配料加上青口到就焗得 大概10分鐘左右就OK (如果換成帶子就6分鐘OK) 超級好味! 由於每組係8隻青口 所以料其實有剩 於是乎我留左半盒返去整俾小A食 第二日去759 買左依盒野 佢本身係有汁既 但我倒左 180度光波左8分鐘成事! 好味道 不過我覺得下次可以光波6分鐘試下 小A都贊好呀! 可惜依年腸胃唔好既小A 清慣左 依味菜太油了 佢肚痛左2日 >_<