你對上一次去動物園係幾時？琴日？還是幾年前？記憶中，我每次去動物園都是和老豆去的，日本的，香港的……老豆好鬼鍾意睇動物節目，仲記得以前細個逢星期三晚一定全家一齊睇「變變變生命力」，睇住啲蛇冬眠後點脫皮，北極熊如何覓食，老虎點樣交配。所以每次跟兩老旅行，我例牌會把「參觀動物園」加入是日行程裡，咁就實無死，仲一定冧得掂老豆。仲記得每次同老豆去動物園，佢都好興奮咁同我地介紹各種類的動物，牠們如何獵食、有咩性格特徵等等，就好似小智嗡得出每隻小精靈有咩絕招同能量值幾多，個人黎講對此非常 impress。前陣子，我同屋帶了我去南澳的 Monarto Zoo，呢次係我咁大個女第一次去動物園而唔係同老豆去…… 亞德萊德城市裡面本身都有個動物園，我未去過，但係同屋鍾意 Monarta 的原因都係因為細個屋企人帶過佢黎。入場盛惠＄32.5，有 YHA 會平幾蚊。有別於 City 入面個動物園，呢個園絕對建議你揸車去，因為在門口俾完入場費後，仲要揸一段路才到園區。 由於個園真係好大，所以主要靠每隔半個鐘一班的Shuttle bus 送遊客去園內不同範圍睇動物。你可以因應你想睇咩動物而選擇在邊個站落車，然後作近距離觀看。不過9成坐在車內都可以清楚觀賞，車內更有員工同你介紹你依家睇緊甚麼動物，有甚麼特性等等。 是日Highlight 點莫過於長頸鹿園區，因為我可以超近距離同長頸鹿鬥睥，你眼望我眼咁，好不有趣！佢地又唔怕人，對每個觀眾報以友善的目光。而且觀景臺附近就有個食物台，久不久就有長頸鹿行埋去食野，所以保證你實有同佢地有鬥睥的機會。 而我最鍾意呢個園的原因是夠大，有時我覺得旅行去玩想 experience 想見識係理所當然，不過如果呢個景點會犧牲了動物自身擁有的權利，例如自由地走動，那麼就算玩都唔安落，盡量避免。但在 Monarto Zoo，你感覺到即使生活在園裡的動物，也不會過份被管束，有足夠自由與空間活動，有別於我曾去過的動物園，小小的籠就住著幾隻動物，偷走了牠們的自由，睇也不忍心。所以置身在 Monarto Zoo，我也誤以為自己去了非洲，一大片草原任動物自由活動，閒時與其他物種「吹水」開Party，睇得相當舒服。 x, 勝仔 •••••••••••••••••••••••••••••••• Facebook: Singotravel Instagram: @singotravel Blog: singotravel.com YouTube: Singotravel 勝仔單身遊
