記得生bb前 我不停睇人嘅生產日記壯膽到我經歷完 都好希望打一篇鼓勵準備生嘅媽媽 而且一定要記低我人生中最勇敢的一刻📝因為我妊娠糖尿加bb size大醫生就要我38週入院催生 否則以我身形好難生等入院催生個4日簡直坐立不安 對生仔感到超恐懼🥶到入院當日 先檢查子宮頸成熟度因為未成熟要放催生藥 然後等運到😂等咗一日都冇反應 等到唔識驚 淨係想快啲生幸運地當晚凌晨4點半開始輕微陣痛 到7:30開始規律咗 然後就穿水見紅 8點幾就去打催生針 11點老公嚟咗 開頭我仲同佢有講有笑後尾姑娘加重咗催生藥嘅份量 開始出汗唔係好講到嘢去到2點直程無法溝通 姑娘檢查開咗兩指仲突然再幫我人手穿水 穿水後開始痛不欲生 嗰種痛就好似比貨車轆過條腰 然後俾人扯住所有內臟🫠好戲在後頭 就係當bb個頭不停向下面衝下半身原來會不受控制 好似驅魔人咁彈吓彈吓最恐怖係有股力量真係好想屙出嚟 但係我記得亂咁屙會搞到下面爛晒 🤯所以我忍 又痛又急真係好辛苦好難頂感覺有10萬隻大笨象衝向下體 好好好好痛感動嘅係笑氣對我好有用 令我迷迷糊糊 痛楚都減半好彩3點幾已經開到八指直落產房 去到產房我要等多十幾分鐘先可以再見到我支笑氣 期間靠意志力同呼吸法 真係好痛 痛到升天🥲(喺我出晒汗同好痛之際 有個姑娘叫咗我四次叫我要帶返個口罩先吸笑氣 心入面真係覺得好煩😂)期間發生小插曲 就係bb個頭面向天 助產士話咁樣一定生唔出 我心諗我點都唔要食全餐所以好乖咁配合佢轉姿勢 再祈禱bb乖乖地等到5點我真係feel到bb個頭要衝出嚟 用盡我畢生嘅力氣Push 我一句救命都冇嗌過只係儲足力氣向下push 用意志力同自己講我一定可以(我最記得老公喺我耳邊同我講 今年諗吓買咩袋佢送俾我 答謝咁辛苦嘅我🤣 我已經諗好啦你記住送😆)最後用咗半個鐘 就成功生咗bb出嚟🥹 聽到bb喊聲同放喺我個肚皮嗰一刻 我真係好感動 ：我終於生完 終於完成一件人生嘅壯舉！好神奇嘅係 一生咗出嚟 真係所有痛楚都冇晒仲好精神咁同老公傾計🤣**由於陣痛嘅痛楚絕對係世界級 所以剪同埋聯針一啲都唔痛 準媽媽可以放心🫣雖然係好痛 但係順產復原真係好快🤘🏻最後 生完就發覺冇想像中咁可怕 我咁細膽又怕痛都做到 比我勇敢嘅一定可以💪🏻
