知道我鍾意旅遊，好多朋友都會問我一啲購買旅遊產品嘅貼士。咁到底點樣先可以買啲平靚正嘅嘢呢？ 今次先教大家點買平機票。 1. 留意Shopping魔旅遊日記 (賣吓廣告先) 點解要信我？ Shopping魔熱愛旅遊，熱愛到讀書讀旅遊，畢業之後又做過航空公司同旅行社，對業界資訊聊如指掌，咩為之貴咩為之平，心中有數。 旅遊乃奢侈品 ，慾望無盡而金錢有涯，要去得平去得密去得有質素，唯有不斷睇實個市。再加上Shopping魔每日嘅工作根本就係要搵平機票酒店，通常市場未有得賣我已經收到風架喇。 8-) 2. 旅遊淡旺季 旅遊淡季旺季，機票價錢可以差好遠。人人都想唔使請大假就可以出走，所以大時大節long weekend航空公司就會吊高嚟賣。所以如果想買平機票，就必須要避開呢啲日子。 另外每個星期每日都有分出發回程高峰期，一般星期日一二都會比較少人出發，而星期四五就少啲人回程；少啲人選擇夜機出發，選擇早機回程。將貨就價，知道邊啲航班冇咁受歡迎，就估到買咩有得平喇！ 3. 早買早享受，遲買平2舊 一般黎講，機票係越早買越平。當一班機仲有好多位嘅時候，航空公司為求有足夠收入去支持一班機嘅營運成本，會用平價機票去吸引乘客。之後因為機位賣一個少一個，當然會越賣越貴。 咁點解遲買又會平2舊？如果離出發日期越來越近，但係班機仲有位，要增加收入，就唯有靠last minute特價機票黎散貨。其中國泰港龍嘅fanfare就係表表者。 不過如果係非去不可嘅旅遊，最好都係早啲準備啦！ 4. 機票格價平台 (Metasearch) 網上有一啲搜索引擎會集合晒所有機票供應商嘅貨，再整合俾用家睇，例如港人熟悉嘅Skyscanner、Trivago同又飛啦! Flyagain.la，都有提供呢種功能，而且係免費，可信性高，非常值得參考。當然有時候未必可以盡信，都係貨比三家好。 想知多啲關於搜索引擎嘅用法同好處? 可以參考什麼是格價搜索引擎 Why Metasearch?。 5. 追蹤航空公司、旅行社、旅遊資訊網Facebook page 供應商有平嘢出，當然都會第一時間靠自己嘅頻道公佈啦，尤其係限量限時嘅特價產品，以香港人手機不離身，沉迷facebook嘅程度，足以令供應商提供最即時嘅優惠俾大家。 而旅遊資訊網，所指嘅係又飛啦! Flyagain.la，MeetHK.com 旅遊情報網 等網站，一有咩荀嘢同漏洞都會通知fans，社交媒體嘅影響力之大，真係唔到你唔服呀! 不過見到優惠都要冷靜，記住貨比三家呀!
