【魔遊記】迷人塔省 法式浪漫甜蜜 蜜月第三天 是日行程: 朗塞斯頓 → Bridestowe Lavender Estate → Hillwood Strawberry Farm → Tasmanian Honey Co. → 朗塞斯頓 醉人香氣 法式浪漫 食完早餐之後就出發。一直以為歐洲日本先有嘅薰衣草田，喺做資料搜集嘅時候先知原來塔斯曼尼亞都有，仲要咁啱1月就係收成期添!上次去富良野時啲花未開，今次有機會一定要去Bridestowe Lavender Estate睇吓啦! 係咪隔住個mon都聞到陣味呢? 偏偏Shopping魔個鼻仍然塞到不行，係老公一味講「好香呀好香呀」我就唯有答「係咩? 哦。」 角度的重要性，其實喺靚相睇唔到嘅角度係會有爛地，同埋係超級多蜜蜂架! 當日因為係收成期，所以會見到架收割車喺一行行嘅薰衣草上行駛，自動將所有花蕾收割好，然後再送去加工。 既然親眼見到啲薰衣草咁新鮮，一定要試吓用佢嚟整嘅美食啦! 農場裏面有一間cafe同埋鋪頭賣一啲薰衣草產品，Shopping魔點會錯過呢? 分別點咗薰衣草奶昔同蜜糖奶昔。薰衣草味有啲怪怪，蜜糖味太甜，好彩薰衣草Brownie冇令我失望，加埋啲雲呢拿雪糕真係超好食啊! 必食必食! 食完甜品，緊係食啲水果添啦，所以下一站係去即!摘!即!食!莓! 甜蜜草莓果園 Hillwood Strawberry Farm雖然個名係叫士多啤梨農場，但其實入面除咗士多啤梨，仲有其他水果，有紅莓、長莓、黑加倫子等等莓類。成個農場都好大，雖然冬天先係士多啤梨嘅當造期，但係都有唔少又紅又大粒嘅士多啤梨摘!農場冇入場費，但係所有莓都係斷磅計的。一入場職員就俾咗個膠兜我哋，然後就好興奮咁周圍摘喇! 天氣真係好好，好猛太陽，所以Shopping魔都好好保護自己，草帽黑超不可少。 因為夏天唔係莓類收成期，見到一株株莓果掛喺樹上都覺得好靚好開心。 你睇啲士多啤梨~~ 由頭紅到落腳趾尾架! 摘完想即刻食? 農場入面有間cafe，有由各種莓類嘅製成品出售，Shopping魔就選擇咗呢款士多啤梨新地! 新鮮真係唔同啲，Yummy! 離開之後又係一片荒涼。 塔省限定滋味 革木係塔斯曼尼亞獨有嘅植物，所以革木花嘅蜂蜜就只有呢度先有。革木蜂蜜純度同UMF指數都極高嘅蜂蜜， 係居家送禮必備良藥，咁啱朗塞斯頓附近有一間Tasmanian Honey專賣店，所以一定要試一試! Tasmanian Honey Company 入面有各試各樣嘅蜂蜜可以試味，花多眼亂，但係識買，就一定係買革木蜂蜜啦! 買完特產就返返去朗塞斯頓食晚飯。今晚只係求其去左間餐廳食，牛、雞都係一般。 反而以下呢盤有驚喜。估唔估到係咩? 係炸鱷魚肉呀，啲肉有啲似雞肉，去開澳洲可以試試。 又一天。 待續... 第一天 【魔遊記】迷人塔省 始於朗塞斯頓 第二天 【魔遊記】迷人塔省 搖籃下的白鴿
