觀看Shopping魔其他文章: http://shoppingmor.blogspot.hk/ 蜜月第二天 是日行程: Mole Creek Guest House → Dove Lake (Cradle Mountain) → Sheffield → 朗塞斯頓 一早起身，yeah我生日! 但係病到甩轆。出門口時撞到執房嬸嬸，同佢講我明明honeymoon緊又生日但係病咗，佢都鄧我好唔抵，唉... 點都好，Shopping魔嘅雅興冇咁易被打敗，旅行點都要振作! Check out咗就繼續進入深山，睇Cradle Mountain 搖籃山喇! 途中風景真係好靚，忍唔住半路中途落車影幾張相。 其實基本上成程啲風景都靚到嘔，真係有啲大驚小怪。 人間仙境鴿子湖 一嚟到，嘩靚到! 有啲遺憾嘅係，今日係全個旅程最唔好天嘅一日，雲層好低所以見唔晒成個搖籃山。 想睇Cradle Mountain唔係真係要爬上去，欣賞佢嘅最佳地點其實係山腳嘅一個湖 Dove Lake。 Dove Lake週邊有好多步道，難度有辣有唔辣，任君選擇，遊客可以根據個人能力同需要去選擇行邊條路。最短嘅一條路半個鐘已經可以行完，而最長嘅要上山，要成8個鐘先可以完成。作為初級嘅Shopping魔決定揀最多人行嘅路線，沿Dove Lake行一圈，預計要2個鐘。 正因為難易度同所需時間都有所不同，每位遊客都要喺出發前留低資料同出發時間，完成之後就check out，如果有人不幸失蹤遇險都有線索搜救。 唔知塔斯曼尼亞係因為屬於溫帶定係位於南半球嘅關係，有好多Shopping魔從未見過嘅植物，好神奇好得意好靚。 Dove Lake嘅湖水雖然好清，但係因為湖入面嘅礦物質而令啲水睇落係黃色，千其唔好誤會啊。 一路行一路影，最後足足行左2個半鐘先完成。出咗身汗，天氣都稍為變好，心情都一齊變好~~ 藝術小鎮Sheffield 完成創舉之後就離開深山，去咗一個以壁畫而聞名嘅美麗小村落Sheffield。 話說當年拍電視節目嗰陣陳奕迅都喺度留咗一幅大作，估唔到keep到依家呢，集一集郵先! 之前有睇過啲報導話Sheffield有一位伯伯會拖住佢隻寵物行街街，好彩嘅話撞到佢佢都好樂意俾遊客影相留念。咩寵物咁巴閉?答案就係一隻草泥馬喇! 不過可能當日太晏，見唔到伯伯同草泥馬。 去完2個check point，已經嚟到非常之晏嘅晏晝，非常之肚餓，但由於Sheffield只係一個人口不足千人嘅村落，最後只係搵到一間cafe未關門，喺佢last order前叫左2件蛋糕同2杯咖啡頂頂肚。 食完蛋糕就出返城市嚕。沿途風光明媚，有好多牛牛喺度放牧。 條路又冇乜車，好舒服呀! 溫馨朗塞斯頓 朗塞斯頓，一個充滿溫馨感覺嘅城鎮。點解會係用溫馨嚟形容一個地方?可能就係因為民宿同民宿嘅主人帶俾我嘅觀感啦。 Shopping魔是日入住嘅係Ashton Gate Guest House，喺住宅區入面，距離市中心只係15分鐘步行時間，非常寧靜舒適，不愧為朗塞斯頓排名第3嘅民宿! 主人Jennifer係一個非常和藹可親嘅姨姨，沿路介紹民宿嘅每一個角落，交代早餐安排等等，又教Shopping魔點去今晚用饍嘅餐廳，非常親切。 成間民宿同埋間房都勁英國家庭feel，好靚啊! 放低啲行李，就出發食晚飯。 Hallam's Waterfront Restaurant係當地一間好出名嘅餐廳，就喺遊艇會隔離。因為冇訂位，所以要等一陣先入得，於是我哋就喺附近影吓相，散吓步。 夏天嘅培斯曼尼亞真係好舒服，因為對面海就已經係南極，所以唔會太熱，又因為寒冷嘅海流，濕度唔會太高，日照時間又夠長，所有嘢都恰到好處。 時間過得好快，終於可以開餐喇! 嚟斯曼尼亞點可以唔食生蠔呢? 仲有魚魚魚魚魚 不過不失啦，然後食飽飽就返民宿瞓覺嚕。 待續... 第一天 【魔遊記】迷人塔省 始於朗塞斯頓
