#新加坡 day1 行程: Hotel Kai--->Suntec City--->濱海灣一帶--->春到河畔 麻雀雖小，五臟俱全Hotel Kai 房真心唔大，擺放行李都有少少難度，但佢勝在麻雀雖小，五臟俱全。 LOBBY就是食早餐的地方，食物都係基本款，有蛋、腸仔、薯餅之類。 新加坡第二大商場--Suntec City 交通方案: Promenade站上蓋 喱個商場就喺酒店附近，無理由唔去逛逛，行完真心覺得唔需要消費，因為所賣嘅品牌香港都有，好似Cotton On 、H&M等，論款式香港更多。值得一提的是，香港受歡迎嘅Fast Fashion 品牌，如Uniqlo，喺新加坡就唔多興香喇，連經理都要出埋嚟派傳單宣傳，我就冇喺香港見過囉。 不過，行街都係次要，搵亞坤多士先係主打。亞坤伽椰多士喺新加坡無人不曉，分店眾多，唔識揀就揀套餐較穩陣(SGD4~5)。半熟蛋、伽椰多士配上一杯冰咖啡就係最傳統嘅食法。 KAYA醬食落甜甜地，又唔會好重椰子味，多士焗得鬆脆，果然係亞坤招牌。相對地，半熟蛋同凍咖啡就相形失色。雖然店員係用拉茶方式去沖咖啡，但味道就如麥記即磨咖啡一樣。半熟蛋食落應該係鹹蛋，需要落豉油、胡椒粉調下味先好食。簡單來說，將焦點完全放在多士便可。另外，喜歡KAYA醬嘅朋友，可以順便買埋樽KAYA醬做手信，俾各方好友品嘗新加坡好味道。 分店位置: Suntec City B1 營業時間: 7:30 a.m. - 10:00 p.m. 網站連結: www.yakun.com 濱海灣—金沙購物商城、金沙酒店、濱海灣公園一帶 交通方案: Promenade站，坐Circle Line一個站就到Bayfront--濱海灣 Shopping Mall都有得玩搖櫓?! Bayfront左手邊出口就係金沙購物商城，商店來說就同香港冇咩分別架喇，所以行唔行就自己決定啦。不過講到佢最具特色嘅地方係入面有條人造小河，原意係俾人們感受吓悠閒輕鬆咁上下嘅嘢，而佢果隻船就沿用番新加坡早期舢舨嘅慨念，都叫做懷舊，幾得意。所以，如果行到腳攰，坐船休息吓都不失為一個好選擇。 船費: SGD 10 售票櫃台：B2禮賓服務處 網站連結: http://hk.marinabaysands.com/shopping/highlights-promotions/sampan-rides.html 古怪設計金沙酒店 離遠望第一個反應係:「嚇死人咩，個心離一離呀!」。宏大嘅建築，加上具有弧度，唔係一般直線設計，最頂仲有個類似UFO飛碟嘅物體，奇奇怪怪咁。行近望入房間係梯形嘅設計，令人不禁停下腳步，醉心研究當中嘅建築科技。喱間金沙酒店位置絕無僅有，試想像自己為酒店房客，從窗邊眺望出去，整個濱海灣公園、摩天輪，加上景色醉人嘅日落映入眼簾。得閒仲可以上最頂游水，一邊游水一邊睇景，勁嘆。真心，我已經訂立下次去新加坡嘅第一個mission，就係儲錢住金沙酒店! 點擊圖片放大 置身阿凡達世界的錯覺 金沙酒店對面就係濱海灣花園，以前睇過其他blogs，話呢個就好似置身於阿凡達世界，親身目睹下我更確信呢個諗法。因為整個設計就好人工化，喱幾棵擎天樹都唔係真嘅植物，只係人工建構出嚟。與此同時，若果你想飽覽濱海灣嘅夜景，可以選擇再夜少少嚟，因為佢有配合音樂的燈光表演。 唔畏高嘅人可以上呢條橋近距離觀賞，但我喱啲梗係唔會上喇。 春到河畔迎新年2016 從濱海灣花園直走，眼睛瞄過河對面，對面放滿各種大型花燈，又有賀年歌曲除除響起，人頭湧湧，好不熱鬧。隨著人潮走向彼岸，驚覺此是新加坡特有的賀年活動--春到河畔，每年均會從初一舉辦至初七。咁好彩喺最後一日參與此盛會，不單可以喺臨時夜市食特色小食，甚至能夠以極近距離欣賞煙花，眼界大開。 直行就係夜市現場，各地美食都有。 喱檔非常多人排隊，所以我都心郁叫咗份嚟試味。 我一直以為整緊PANCAKE(我認我白痴)，誰不知原來係Rolled Ice Cream。無論toppings,dressings同雪糕嘅口味都可以任君選擇，而我就揀咗士多啤梨笨奶奶，朱古力醬做dressings，toppings我是揀了cornflakes。食落其實就普通雪糕咁啦，特別就冇乜啦，溫馨提示，因為新加坡天氣真係頗熱，佢堅快融，但同時雪糕又好凍嘅情況之下，唔快少少食就會勁狼狽! 點擊圖片放大 活動場地嘅花燈都係以今年生肖、財神爺為主，花燈隔離仲起咗個大型舞台，都係搞下傳統嘢，唱下新年歌咁。 最值得一提嘅攻略，喺香港睇煙花，一般印象就係，如果想霸個靚位，晨咁早就要去到乾等，又要同人逼，想去廁所都驚走咗冇咗個靚位。不過，如果你咁啱新年去新加坡，又咁好彩9點經過連接濱海灣個商場果條橋，就會好似小女子咁幸運睇到煙花。呢件事完全出乎意料，我只不過係肚餓想去商場個大食代醫肚，竟然獲得人生第一次咁近距離欣賞煙花嘅經驗，令我對新加坡嘅好感度提升哂。(如果各位唔嫌棄我嘈，你可以click入去睇，你亦可選擇mute) 煙花片段: https://youtu.be/rt76PDuXG9g 活動連結: http://www.riverhongbao.sg/ Day1就介紹到咁多，下回分解。
