雖然我唔係咖喱控，但係當諗唔到食咩嘅時候通常都會揀咖哩～而當中我最鍾意嘅就係日式咖喱！記得啱啱學煮嘢食嘅時候淨係識得煮蔬菜，所以蔬菜咖哩就成為我最拿手嘅菜式～日式咖喱係最簡單嘅，因為只要買到好食嘅咖喱磚就好難煮得唔好食（笑），而且多數咖喱磚都唔會唔好食～所以都可算是零失敗之作！ 大家可以根據自己口味選擇鍾意嘅咖喱磚同蔬菜，今次我係配烏冬，但係配飯、意粉、麵包定其他嘢就真係適隨尊便～ 難易度：★☆☆☆☆ 卡路里：187 x 4 （淨咖喱，粉麵飯另計） ** 卡路里只供參考，唔同牌子嘅材料營養成分都不盡相同 ** 唔同嘅微波爐設定會有所不同，請根據設定作適當調整 材料： 日式咖喱磚（大概半盒） 90g 洋蔥 半個 紅蘿蔔（細） 1/3 條 薯仔（細） 1個 翠玉瓜 1/3 條 水（室溫） 500ml 工具： 大玻璃兜（我係用1.5L嘅西方形康寧煲） 1個 步驟： 1）先將蔬菜洗淨，然後切粒，盡量切細粒，切好之後放入玻璃兜 2）加入500ml水，蓋好入微波爐，1000W，15分鐘 3）切細咖喱磚放入玻璃兜，蓋好焗5分鐘，然後1000W，5分鐘，食得！（如果仲係太稀加叮3分鐘） *:._.:*~*:._.:*~*:._.:*~*:._.:*~*:._.* 開咗Facebook page啦～請多多支持！歡迎分享同交流！ 「無火免焗食譜交流中心」逢星期六更新，同大家分享簡單又大眾化嘅食譜！ 請Like 無火免焗食譜交流中心 *:._.:*~*:._.:*~*:._.:*~*:._.:*~*:._.* 搜尋或查閱食譜更輕鬆！ Cookpad Page： https://cookpad.com/tw/%E4%BD%BF%E7%94%A8%E8%80%85/6364344
