係呀～又係芝士！冇辦法啦～鬼叫真係好好食！所以今次會健康D，我哋一齊嚟整個芝士叮西蘭花！今次用嘅會係新鮮西蘭花，西蘭花含有多種維他命同礦物質，而且仲高纖低卡！簡直係女士嘅恩物～如果唔鍾意食芝士，可以落少少鹽同胡椒粉調味。 講開又講，好多人煮西蘭花會將個莖掉左去，其實個莖都食得架～只要洗乾淨切走唔靚嘅部份，之後切片炒又得，切粒放入湯度煮又得，唔浪費之餘仲可以增加餸菜口感～下次大家煮西蘭花就試吓啦～ 材料： 西蘭花 一個（細） 芝士碎 100g（冇嘅話，片裝芝士都OK） 熱水 適量 工具： 有蓋微波爐盒 1個 刀 1把 步驟： 1）先切西蘭花，盡量切細啲，然後洗乾淨（西蘭花莖留待下次煮餸用） 2）將洗好嘅西蘭花放入微波爐盒，盡量唔好搭住，然後加水至啱啱好蓋過微波爐盒底，唔好加太多 3）蓋好，入微波爐，900W，5分鐘（如果鍾意食林啲，搞一搞佢再叮3分鐘） 4）隔走熱水（小心熱！），加芝士，再入微波爐，900W，1分鐘，食得！ *:._.:*~*:._.:*~*:._.:*~*:._.:*~*:._.* 開咗Facebook page啦～請多多支持！歡迎分享同交流！ 「微波爐食譜交流中心」已正式改名為「無火免焗食譜交流中心」，繼續分享更多簡單又大眾化嘅食譜！ 請Like 無火免焗食譜交流中心
