好味嘅嘢食通常都係唔健康，煎炸油膩高卡路里永遠都係最容易令人食唔停口XD 不過少食多滋味，間唔中都要食返啲真正有營養同健康嘅嘢，吸收返啲纖維，排清毒素咁先可以再食多啲唔健康嘅嘢（大誤XD）！今次介紹嘅蔬菜Bowl其實好簡單，都係叮熟啲嘢撈埋一齊就食得，所以為表誠意我成推以下嘅高纖組合： 蕃薯：每100克嘅番薯就有4克纖維，而且含有豐富維他命A，同紅蘿蔔一樣對眼睛特別好，所以除咗高纖健康之外，都好適合成日望電腦望電話嘅你！ 紅腰豆：每100克紅腰豆就有6克纖維，如果唔抗拒豆類真係食多多都無妨！ 粟米：幾乎每個曾經嘗試減肥嘅人都知道粟米係寶！雖然每100克粟米只有2.7克纖維，但係佢所含嘅其他營養例如蛋白質、鉀同鎂都係人體所需要嘅重要元素！ 材料： 細番薯 1個 罐頭紅腰豆 3-4湯匙 罐頭粟米粒 3湯匙 牛油 1茶匙 鹽 & 胡椒粉 少許 熱水 適量 工具： 中碗 1隻 削皮刨 1把 湯匙 1隻 茶匙 1隻 步驟： 1）蕃薯去皮切粒，大概1立方厘米大細（如果係日本番薯，洗乾淨可以唔去皮），放入碗 2）加入熱水至完全蓋過蕃薯粒，入微波爐，900w，4分鐘，唔好拎出嚟住，由得佢喺入面燘1分鐘（試一試，如果仲係好硬就加叮1分鐘） 3）隔走熱水（小心熱！），加入其他材料，用牛油、鹽同胡椒粉攪勻 4）入微波爐，900w，45秒，攪一攪，再叮30秒，食得！ *:._.:*~*:._.:*~*:._.:*~*:._.:*~*:._.* 開咗Facebook page啦～請多多支持！歡迎分享同交流！ 「微波爐食譜交流中心」已正式改名為「無火免焗食譜交流中心」，繼續分享更多簡單又大眾化嘅食譜！ 請Like 無火免焗食譜交流中心
