細細個跟爸爸去飲茶，就算天寒地凍都最鍾意叫芒果布丁，不過其實我唔係鍾意食芒果⋯⋯只係鍾意食布丁軟林林嘅口感，只係無其他選擇XD 大個先知原來係有熱食布丁的⋯⋯咁當然唔係熱芒果布丁啦！眼見冬天已經（終於？）來臨，今日就介紹個暖笠笠既朱古力布丁食譜比大家！ 我用70%黑朱古力，味道相對比較濃同無咁甜～如果鍾意咖啡不妨加少少即沖咖啡粉咁就變成Mocha 布丁XD 呢度咁樣細細杯其實就已經348卡路里⋯⋯不過天寒地凍，要攝取返多啲卡路里先可以維持生命，一次半次豪比佢啦！ 材料： 朱古力 50g（乜嘢朱古力都得） 粟粉 1茶匙 全脂牛奶 半杯（大概120ml） 糖 1茶匙 雲呢拿香精 半茶匙 （Optional） 糖粉 1茶匙（裝飾用，Optional） 工具： 刀 1把 杯 1隻 茶匙 1隻 步驟： 1）切碎朱古力，放入杯中同粟粉攪勻 2）加入牛奶、糖同雲呢拿香精攪勻 3）入微波爐，900w，1分鐘 4）攪勻，加叮30-40秒，重複呢個步驟直至所有野完全混合至杰身 5）灑上糖粉裝飾，食得！ *:._.:*~*:._.:*~*:._.:*~*:._.:*~*:._.* 開咗Facebook page啦～請多多支持！歡迎分享同交流！ 「微波爐食譜交流中心」已正式改名為「無火免焗食譜交流中心」，繼續分享更多簡單又大眾化嘅食譜！ 請Like 無火免焗食譜交流中心
