唔知大家會唔會好似我咁，有陣時好想食pizza，但係又冇人陪，自己點KO晒一個喎⋯⋯好肥架嘛！仲有仲有～咁大個Pizza得一種口味⋯⋯好悶架嘛！不過依家有呢個食譜就唔使怕啦～細細個一個人獨食啱啱好～又唔會飽到上心口！而且DIY鍾意落乜嘢餡料都得！個芝心派底一咬落去啲芝士「必」晒出嚟！啱晒我呢啲芝士控！ 成個Pizza嘅卡路里因應唔同Toppings分別可以好大，就我呢個最Classic嘅Pizza而言，食晒成個係905卡路里，看似好多，但係作為超滿足嘅一餐其實都唔算太過分姐～ ^皿^ 如果真係覺得905卡路里好有罪惡感，可以減少芝士用量，用全麥Tortilla 同低脂低鹽醬料，應該心理上會好過啲 XD 材料： ｛批底｝ Tortilla（墨西哥薄餅） 2塊（我用嘅大細係6吋） 片裝芝士 2片 Mozzarella 芝士碎 2湯匙 ｛Toppings} 茄汁 1茶匙（千島醬係一個唔錯嘅代替品） 沙律醬 1茶匙（用鮮果乳酪都得） 車打芝士碎 5湯匙 Mozzarella 芝士碎 3湯匙 辣肉腸 6片 （或者火腿都得，唔食肉可以轉青紅椒同菠蘿碎） 鹽 & 黑胡椒粉 少許 工具： 大玻璃碟 一隻 茶匙 一隻 步驟： 1）先將1塊Tortilla放喺碟，然後將一片片裝芝士放中間，另外一片芝士對摺再對摺，變成四條長芝士條，放喺Tortilla嘅四邊空位 2）灑上2湯匙Mozzarella 芝士碎，然後鋪上另一塊Tortilla，輕輕壓實 ＊如果唔鍾意食芝士，可以就咁查啲茄汁或者其他鍾意嘅醬料，但係建議唔好只係用1塊Tortilla 做批底。 3）係砌好嘅批底用匙羹背揸一層茄汁同沙律醬，灑少少鹽同胡椒粉（鍾意食辣嘅可以加d Tabasco或者辣椒粉） 4）之後灑上一層厚厚嘅車打芝士碎，鋪上辣肉腸，再灑一層Mozzarella 芝士碎 6）入微波爐，900w，3分鐘，摸下碟底熱唔熱（碟邊可能好熱，小心！），如果唔熱再叮1分鐘（基本上碟底夠熱，面頭嘅芝士應該已經溶晒，如果未溶得晒就加多30秒，直到芝士溶晒為止）食得！ *:._.:*~*:._.:*~*:._.:*~*:._.:*~*:._.* 開咗Facebook page啦～請多多支持！歡迎分享同交流！ 「微波爐食譜交流中心」已正式改名為「無火免焗食譜交流中心」，繼續分享更多簡單又大眾化嘅食譜！ 請Like 無火免焗食譜交流中心
