可能有啲人早餐唔食返個火腿通或者腿蛋治就會成日都冇精神，以我身為一個甜食愛好者，一朝早唔食啲甜嘢又真係會覺得頭暈暈～但係我心知太甜又唔健康⋯⋯所以唯有另食落肚嘅嘢多啲營養！呢個燕麥早餐我真係好鍾意～不過因為太好味會覺得食極都唔夠⋯⋯所以依家同大家分享，睇吓究竟係我太為食定佢太好味～XD 呢個份量大概有410卡路里，主要來自花生醬，我試過只係落一湯匙嘅花生醬，口感會冇咁結實但係味道唔差太遠。怕肥嘅你可以選擇減少花生醬～至於唔怕肥嘅你⋯⋯可以提子乾同果仁一齊落，一定令你食唔停口！ 材料： 香蕉 1/2條 花生醬 2湯匙 蜜糖 1/2湯匙 牛奶 1湯匙 即食麥皮 4湯匙 提子乾 1湯匙（可以用果仁代替） 工具： 湯匙 一隻 杯/細碗 一隻 叉 一隻 步驟： 1）用叉將香蕉壓爛 2）加入花生醬、牛奶、蜜糖攪勻 3）加入麥皮同提子乾攪勻 4）入微波爐，900W，1分鐘（如果未變乾身就加30秒），食得！ *:._.:*~*:._.:*~*:._.:*~*:._.:*~*:._.* 開咗Facebook page啦～請多多支持！歡迎分享同交流！ 「微波爐食譜交流中心」已正式改名為「無火免焗食譜交流中心」，繼續分享更多簡單又大眾化嘅食譜！ 請Like 無火免焗食譜交流中心
