意粉嘅兩大主流，一係紅一係白，白汁嘅就煮得多啦，今次試吓煮紅嘅。另外成日食螺絲粉食都悶悶地，今次我哋煮星星粉！其實冇乜特別嘅，只係形狀唔同～不過星星粉比螺絲粉細粒好多，所以煮嘅時間相對短啲。如果唔鍾意星星粉都可以用字母粉或者其他細細粒嘅意粉代替。如果你都係想食大大粒嘅螺絲粉或者通心粉，咁叮既時間就要加多少少～ 材料： 星星粉 100g（或者字母粉，主要要用細細粒嘅粉，亦可用其他意粉代替） 熱水 適量 粟粉 1.5茶匙 蕃茄意粉醬 5湯匙（如果頽到想用茄汁都得，不過要加少少糖，口感冇咁「削」） 牛奶 2湯匙 Tabasco 1茶匙（唔食辣可以唔加） 工具： 碗 一隻 茶匙 一隻 湯匙 一隻 步驟： 1）星星粉係碗到用熱水浸過面，入微波爐，600W，5分鐘（如果用螺絲粉或者通心粉呢啲大粒嘅意粉，就叮6分鐘） 2）隔走熱水（小心熱！），加入粟粉攪勻 3）加入番茄意粉醬、牛奶同Tabasco攪勻 4）入微波爐，600W，1分30秒，食得！ *:._.:*~*:._.:*~*:._.:*~*:._.:*~*:._.* 開咗Facebook page啦～請多多支持！歡迎分享同交流！ 「微波爐食譜交流中心」已正式改名為「無火免焗食譜交流中心」，繼續分享更多簡單又大眾化嘅食譜！ 請Like 無火免焗食譜交流中心
