芝士的確係人見人愛,至少我自己係勁鍾意!而香港人對通心粉就係有一種情意結,兩者融合一齊嘅結晶品,有乜可能唔吸引?一諗起杰撻撻嘅芝士,同通心粉熱辣辣咁撈埋一齊,真係唔肚餓都流口水!事不宜遲,郁手做啦! 咁樣一碗Mac & Cheese大概525卡路里,熱量主要來自通粉,始終係澱粉質,但係肥唔肥就取決於你用乜嘢芝士,如果你真係唔想咁肥,可以減少一片芝士,甚至只係用一片低脂芝士~那亦都可以選擇脫脂奶,咁當然會冇咁滑溜啦~不過扣起出嚟嘅卡路里都可能夠你食多一個蘋果^皿^ 材料: 通粉 100g 熱水 適量 牛奶 100ml 粟粉 1/4茶匙 車打芝士片 2片 工具: 碗 一隻 茶匙 一隻 步驟: 1)通粉係碗,熱水蓋過面,入微波爐,600w,4分鐘 2)倒走啲水(小心熱!),加入牛奶粟粉攪勻 3)將芝士片搣成細細塊加入碗中輕輕撈勻 4)入微波爐,600w,1分鐘,拎出嚟攪勻 5)再入微波爐,600w,30秒 6)按個人喜好加芝士碎、少許鹽同胡椒粉,食得! *:._.:*~*:._.:*~*:._.:*~*:._.:*~*:._.* 開咗Facebook page啦~請多多支持!歡迎分享同交流! 「微波爐食譜交流中心」已正式改名為「無火免焗食譜交流中心」,繼續分享更多簡單又大眾化嘅食譜! 請Like 無火免焗食譜交流中心