普通嘅芝士蛋糕可能已經食到好悶,但係無可否認芝士蛋糕又係幾受歡迎嘅~之前係網上睇到有人教整呢個一口size嘅甜品,雖然製作時間有啲長,不過勝在材料易搵,所以今日就來一個實戰!如果係屋企開party,今次呢一口朱古力脆皮芝士蛋糕粒就啱晒啦~有新意得來又好味!一定可以封住班friend把口! 雖則話明一口size,我呢個份量放入一個18cm x 18cm嘅食物盒係切到七七四十九粒,但係我都仲係覺得有啲太大粒⋯⋯所以大家可以自行斟酌食物盒嘅大細~(唔知你個口有幾大架嘛~XD) 材料: 馬利餅 120g 牛油 80g 忌廉芝士 350g 鹽 1茶匙 雲呢拿香精 5g 粉糖 5湯匙(根據個人喜好可加可減) 朱古力 200g 工具: 大正方形/長方形有蓋食物盒 1-2個 大碟 1隻 碗 2隻 牛油紙/蛋糕紙 2張 茶匙 1隻 湯匙 1隻 叉 1隻 步驟: 1)馬利餅係密實保鮮袋壓碎 2)牛油切細,入微波爐,600w,30秒或直至完全溶化 3)係碗將馬利餅碎同鹽、牛油攪勻 4)食物盒用牛油紙舖底 5)將已經撈勻嘅餅碎到入食物盒壓實,入雪櫃,2個鐘 6)係另一隻碗將忌廉芝士攪溶至creamy狀 7)加入粉糖同雲呢嗱香精攪勻 8)倒入食物盒鋪平,入冰格,8個鐘(最好過夜) 9)朱古力係碗,入微波爐,600w,45秒或直至完全溶化 10)將已經雪實嘅芝士蛋糕切粒 11)係碟鋪上牛油紙 12)將切好嘅芝士蛋糕啦遂粒放入朱古力漿,輕輕用叉令到成粒芝士蛋糕都比朱古力包住 13)放喺碟上面,每粒要隔開少少位,完成之後放入雪櫃,只要面頭嘅朱古力硬咗就食得啦! *:._.:*~*:._.:*~*:._.:*~*:._.:*~*:._.* 開咗Facebook page啦~請多多支持!歡迎分享同交流! 「微波爐食譜交流中心」已正式改名為「無火免焗食譜交流中心」,繼續分享更多簡單又大眾化嘅食譜! 請Like 無火免焗食譜交流中心