有時一個人真係好難諗要食啲乜⋯⋯懶得滯可能求其食個沙律就算⋯⋯但係始終有時會想食返啲熱野⋯⋯下下杯面又好唔健康⋯⋯終於有人教整微波爐炒蛋！仲要只係用一隻碟同一隻叉！呢個咁吸引嘅組合我就梗係要試吓啦～因為我冇鹽或者胡椒粉呢啲調味料⋯⋯（係⋯⋯一個人懶起上嚟真係乜都做得出！或者⋯⋯乜都做唔出⋯⋯）所以見到有人話加芝士都OK嘅時候真係跳起Yeah！又咁岩買咗火腿未食晒～咁就來個手撕火腿芝士炒蛋！ 真係講你都唔信！堅好食！芝士半溶，火腿增加口感，味道唔會太咸又唔會太淡！絕對要encore！但係可能因為肚餓而落左兩隻蛋，叮完第一次唔係好熟，中間仲有啲水汪汪，再返叮可能過咗火⋯⋯嗰邊有少少老⋯⋯同埋無事先係碟揸牛油，蛋有少少痴碟。但係整體係超好食！真心推介！ 材料： 雞蛋一隻 芝士一片 火腿兩片 工具： 可盛水高身碟一隻 叉一隻 步驟： 1）先用叉將雞蛋係高身碟發混 2）手撕火腿（求其得架啦～只要唔好太碎或者成片放落去就OK） 3）再手撕芝士，然後平均分佈喺蛋漿度 4）入微波爐，600W，1分半鐘（如果用兩隻蛋應該係未熟） 5）令出嚟，搞搞佢，營造炒蛋感覺，再叮30-45秒，食得！（請按照個人喜好再加叮）
