小妹好耐冇打過食評，我諗咗好耐，應該出咩題材作為久違多時嘅第一篇食評？於是喺眾多食物相中揀咗我食得最多嘅餐廳食物，就係酸菜魚！小妹揀咗4間試過嘅酸菜魚餐廳，全部價錢都接近平民價錢，畀大家作個參考。 (1)具質素嘅酸菜魚@霸王川莊 喺香港仍未咁流行酸菜魚等川菜嘅時候，早已駐足香港多年嘅霸王川莊，招牌酸菜魚(桂花魚價$298)竟然頗有質素，用上原條桂花魚，魚肉雪白，食落嫩滑，有新鮮魚應有嘅彈性同口感，酸菜嘅酸度足，湯底用上多種具麻同辣嘅椒類，如胡椒、藤椒、花椒、指天椒、紅辣椒等，食落又辣又麻，雖然冇大陸酸菜魚嘅辣味咁複雜，但冇十成，都已學到八成。 如果唔鍾意食辣嘢，香煎小黃魚湯麵($82)係唔錯嘅選擇，小黃魚肉質鮮甜，外皮微脆，湯麵嘅湯底呈奶白色，魚味濃郁到可以媲美豬骨湯。 點擊圖片放大 特大新鮮果茶($55)味道一般，但勝在夠大杯，用嚟止辣一流！ 仲有八寶茶提供，正呀! 地址：尖沙咀河內道18號K11購物藝術館3樓314號舖 電話：21100575 營業時間：星期一至日12:00 - 22:30 ＿＿＿＿＿＿＿＿＿＿＿＿＿＿＿＿＿ (2)味道單一嘅酸菜魚@祥仔辣辣 由香港知名廚師Ricky打造嘅川菜，經過各大傳媒宣傳，小妹眼見好似好犀利咁，於是就相約朋友一試，嗌咗一個超抵二人餐($398)，有相關信用卡仲有折！祥仔招牌酸菜魚份量尚可，魚肉冇表明係咩魚，但食落都好嫩滑冇腥味，惟一缺點係居然有骨！呢個係酸菜魚嘅一大敗筆！大家食嘅時候一定要小心。湯底辣度足夠，但就真係得個辣字，完全冇「麻」嘅感覺，睇吓上面嘅材料，就真係得啲乾辣椒，要知道川菜唔係得個辣字。 套餐中有酸辣粉、口水雞、麻辣木耳、麻辣小籠包、乾煸四季豆、麻辣香芹豬肉水餃等，個人反而覺得做得唔錯，但主角酸菜魚就真係有啲失色。由於二人餐份量唔大，所以小妹同朋友嗌多咗個櫻花蝦炒飯，質素一般，多人食飯飽肚之選。 點擊圖片放大 +5 地址：旺角彌敦道639號雅蘭中心2樓201號舖 電話：28851910 營業時間：星期一至五11:30 - 16:00，17:45 - 22:00；星期六至日11:30 - 22:00 ＿＿＿＿＿＿＿＿＿＿＿＿＿＿＿＿＿ (3)港版酸菜魚@稻成小館 如果唔食得辣，稻成酸菜大黃魚($188)應該會係你杯茶。湯底具備「辣」同「麻」嘅味道，但可惜都比較輕身，對於食得辣嘅人嚟講都係唔夠惹味。不過小妹覺得佢嘅魚有少少腥，唔知係咪同佢小辣有關。如果大家想食平啲，佢仲有個酸菜魚片，都係$98，對於對魚冇乜要求嘅人嚟講可以一試。 另外嗌咗個蟲草花炒翡翠苗用嚟緩衝吓麻辣，點知原來係冇咁嘅需要，味道為正常發揮。 地址：屯門屯隆街3號屯門市廣場一期2樓2162號舖 電話：25282618 營業時間：星期一至日11:30 - 22:00 ＿＿＿＿＿＿＿＿＿＿＿＿＿＿＿＿＿ (4)應叫「鹹菜魚」嘅酸菜魚@十十四川料理 小妹見元朗開咗間四川菜，諗住一試，但佢嘅酸菜魚真係令人非常失望。招牌酸菜魚($168例)味道夠辣同麻，但最搶味嘅竟然係「鹹」！鹹到食完條脷係會有苦味，又辣又鹹真係唔知自己食緊咩，魚完全冇味，一夾就散。 點擊圖片放大 本來諗住食啲冰粉解鹹（竟然唔係解辣），點知個士多啤梨冰粉($38)一陣藥水味，再加上啲花生粒有啲「油益味」，又係一伏。 相反其他菜式就做得唔錯，好似涼拌萵筍絲($48)，食落冰冰涼涼又帶少少椒麻味，好正。 而魚香肉絲鍋巴($108)，肉絲有鹹魚嘅鹹香味同椒麻醬嘅辣味，配合炸到香脆嘅鍋巴，令人帶嚟驚喜，好在呢餐飯都唔係完全失望。 點擊圖片放大 +3 地址：元朗元龍街9號形點一期地下G005號舖 電話：27908699／27908661 營業時間：星期一至日11:30 - 22:00
