話說秋天啱啱到，小妹無啦啦就諗起蘋果，於是就搜尋一下同蘋果有關嘅嘢食！ １） 世界一の絕品富士蘋果批＠Mille Mele Tokyo 來自東京嘅人氣蘋果批Mille Mele Tokyo早前登陸銅鑼灣，主打即焗蘋果批，喺日本橫濱同鐮倉有3間分店。「招牌蘋果批」($36/個；$138/4個)以手工製酥皮聞名，加入慢煮厚切富士蘋果粒作餡，配上日本直送吉士忌廉同豆乳忌廉，經兩次烤焗，食落充滿乳製品嘅幼滑口感同香氣。不過小妹覺得佢唔係最好食嘅蘋果批，皆因蘋果肉唔夠多，蘋果肉質素偶有參差，好睇運氣食唔食到香甜蘋果。而酥皮就香氣十足，可惜層次略嫌不足，批身較薄，但整體都算合格嘅。 小妹反而覺得佢嘅「千層牛油脆粒」（$38/杯）嘅層次非常足夠，粒粒都炸到酥香脆口。 「蘋果梳打」($28)，梳打水伴新鮮富士蘋果肉糖漬而成嘅蘋果醬，飲落冰涼而唔太甜，都幾出色。 地址：銅鑼灣霎東街33號地下4B號舖營業時間：星期一至日12:00 - 20:00________________________________２）爆多蘋果肉厚批＠RAPL日本BAKE Inc. 旗下人氣品牌RAPL亦過江香港， 每日現場新鮮烤製，以北海道新鮮牛油揉製出144層酥皮，聞落牛油香味極重，食落又非常鬆脆！呢一間係採用厚切成方粒嘅青森蘋果，味道微酸中帶香甜，再注入新鮮即打嘅吉士醬，食落真心正！呢一間嘅蘋果批隻隻都脹卜卜，原因係佢超揼本，將最多嘅蘋果肉塞入個批度，只用少少吉士醬襯托，所以每一啖都係蘋果肉，認真以本傷人！($42/個；$160/4個) 地址：祟光銅鑼灣店B2/F祟光超市營業時間：周日至四（10am-10pm）；周五、六及公眾假期前夕（10am-10:30pm）________________________________３）在家享用嘅蘋果批＠POMONE蘋果批呢隻蘋果批係小妹喺行超市嘅時候搵到，好多人以為即食嘢就會好難食，但呢個一啲都唔會。成個批蘋果份量好多，而且逐塊切薄片，雖然食落覺得落咗好多糖（都真係要杯茶解解膩），但啲蘋果就非常香甜，係唔錯嘅飯後甜品。不過佢嘅餅底唔知係咪雪得太耐，解凍後較濕，所以要焗一焗先食會好啲，不過小妹用微波爐叮叮佢都唔錯，如果鍾意凍食，喺冰格攞出嚟之後解凍一個鐘到就食得。($78)點擊圖片放大 購買地址：各大超市________________________________４）嘴饞之選＠青森蘋果薯條以新鮮嘅青森蘋果風乾而成，食落非常香甜，脆口唔會油膩，小妹真心覺得仲好食過真嘅蘋果，只可惜一包分量太少，唔使兩分鐘食晒。($38) 購買地址：網店（遊牧雜貨）________________________________５）重量級零食版蘋果批＠Patissier’s 蘋果餡餅連續3年獲得全國菓子大博覽會金賞，亦係銷量最高嘅青森蘋果產品，係青森必買手信，大大條餡餅充滿牛油香氣，內餡係香甜蘋果蓉，由於一條份量大，所以用嚟做Office下午茶最啱。只可惜一盒得5件，食完好快冇。($148)點擊圖片放大 +2 購買地址：網店（遊牧雜貨）________________________________６）成個上嘅霸氣蘋果批＠原個青森蘋果酥皮蛋糕去日本必買之物，經烘焙後嘅酥皮包裹住原個青森蘋果，蘋果香氣馥郁，蘋果果汁依然充足香甜，只係酥皮稍乾，微帶油膩感，一個人食罪惡感超重，同人分享好好多。($125)點擊圖片放大 +2 購買地址：網店（遊牧雜貨）________________________________７）輕量級蘋果撻@青森蘋果小撻佢個味道其實同上面嘅Patissier’s 蘋果餡餅差唔多，只係Size細3倍，罪惡感冇咁重。味道同樣酸酸甜甜，而且個酥皮冇咁乾，食落充滿果汁嘅甜蜜同蘋果嘅香氣。($88)點擊圖片放大 購買地址：網店（遊牧雜貨）
