近日因為疫情關係,好多人都唔可以外出用餐,就連High個Tea都難,但就有酒店推出外賣下午茶,而且仲要係小妹最愛嘅「榴槤」呀!呢個下午茶同原本喺酒店享用嘅下午茶有少少唔同,就係少咗非榴槤嘅鹹點、任食嘅榴槤雪糕同飲品,但價錢就比原先平咗二百幾蚊,大家可以衡量吓抵唔抵。不過小妹就覺得一個可以外賣嘅三層架真係幾神奇(雖然係紙製嘅架,但拎起上嚟好輕好方便),酒店方面仲好貼心咁畀咗個冷凍袋同乾冰,令所有甜品同雪糕Keep住冰凍。點擊圖片放大 其實真正擺甜品嘅係得兩層,下層係英式傳統鬆餅(有傳統嘅提子鬆餅同紅莓鬆餅),另配士多啤梨果醬、Forbidden D24 榴槤蛋卷、馬來西亞直送貓山王榴槤果肉、貓山王榴槤布甸、榴槤班蘭千層蛋糕同烏龍茶啫喱。而上層係抹茶荔枝D24榴槤卷、D197榴槤芝士泡芙、金榜榴槤芝士蛋糕同D24 榴槤椰子糯米糍。外加一個紙杯裝嘅榴槤雪糕。每樣甜品都有兩件,啱啱夠兩個女仔嘅份量。點擊圖片放大 個人認為最推介嘅係榴槤雪糕,真係原隻榴槤肉打成,食落有一絲絲榴槤肉嘅纖維,足料到爆!其實小妹喺佢晚餐Buffet已經食過一次,真係一試難忘,只可惜依家冇得任食。建議將榴槤雪糕搽喺鬆餅上面代替果醬,包保你驚喜萬分。 至於個馬來西亞直送嘅貓山王榴槤果肉,小妹本身都頗期待,但生果嘅嘢都真係幾參差,一嚿香甜得嚟回甘,但另一嚿就完全係苦澀味重,真係睇你有幾好彩,對於未有做好質素控制,呢度真係要扣少少分。點擊圖片放大 其他甜品都不過不失,同佢晚餐Buffet入面食嘅榴槤甜品差唔多質素,比較值得食嘅係貓山王榴槤布甸、榴槤班蘭千層蛋糕同抹茶荔枝D24榴槤卷,最後以烏龍茶啫喱清清味蕾,就係一個Happy Ending。點擊圖片放大 +2 Hotel ICON取貨地址:尖沙咀東部科學館道17號唯港薈大堂餐廳GREEN取貨時間:星期一至日 11am-5pm電話:(852) 3400 1360下午茶套餐價錢:$438(兩位用),至少3日前預訂,並於大堂餐廳GREEN自取