生活好苦，社會好苦... ...長期處於呢種情緒同環境，真係好易變抑鬱，早前小妹暫時放下苦悶心情，食番啲甜嘢調節，苦中一點甜！ 呢間位於元朗嘅甜品店（聽到呢個地方，大家可能已經唔想去，不過唔緊要，你當一篇美食分享睇就OK），主打芋圓甜品，以大堆頭做賣點，用料非常足。點擊圖片放大 「我最喜愛芋圓」($43)用咗三色芋圓（地瓜、紫薯、芋頭）、珍珠、紫薯蓉、仙草、小丸子、紅豆沙、花奶等材料，芋圓咬落微甜帶煙韌，地瓜、紫薯味芋圓薯味超濃，反而芋頭味味道唔突出，都正常嘅，芋頭陣味本身就唔突出，如果太濃芋頭味，反而顯假。最驚人係嚿紫薯好大嚿，綿密口感食到紫薯纖維。由於甜品用料豐富，所以一碗糖水已經食到唔同口感。點擊圖片放大 「D24榴槤皇豆腐花凍芋圓」($44)只用咗兩色芋圓（地瓜、芋頭）、豆腐花同D24榴槤蓉，榴槤蓉唔係榴槤嘅副製成品，而係實實在在嘅一嚿榴槤球，如此真材實料，作為榴槤迷不妨一試。 小妹睇晒佢餐牌，單嗌呢兩樣甜品就可以試勻晒佢啲材料，大家都不妨咁樣嗌。不過食完甜品，香港人又要再加油了！點擊圖片放大 +2 店名：摩登士丹里 地址：元朗青山公路元朗段22-26號金源大廈地下1號舖 電話：Ｎ／Ａ 營業時間：星期一至四12:30 - 23:00，星期五至六12:30 - 23:30，星期日12:30 - 23:00
