日前朋友興高采烈咁拉我去試一間一人一鍋臭臭火鍋店,火鍋選擇都幾多:招牌臭臭鍋、巴蜀烤魚鍋、泰式海鮮鍋、韓國泡菜鍋、咖喱奶蓋鍋... ...非常之International!所以小妹我就試一試。 點擊圖片放大 小妹同朋友對臭嘅事物都幾抗拒,所以冇嗌到招牌臭臭鍋,而係嗌咗沙茶牛肉鍋($108)同藥膳豚肉鍋($108)。睇餐牌嘅時候,發現佢嘅火鍋用料都幾豐富,差唔多個個鍋都十幾種料,但一上枱嘅時候,感覺用料唔多。 沙茶牛肉鍋($108) 藥膳豚肉鍋($108) 可能係個鍋實在太細,每樣嘢得幾嚿,所以感覺冇餐牌上寫到咁震撼。至於味道方面,沙茶同藥膳嘅味道都唔太濃,比起一般大牌子火鍋店嘅火鍋湯底差好遠,所以感覺一般。 飲品方面抄足喜茶,雖然名唔同,但改咗一兩個字都會令人諗起喜茶,好似我嗌嘅芝士桃桃($29)就令人不期然諗起喜茶嘅「芝芝桃桃」。不過用料就梗係比唔上喜茶,桃肉少之又少,茶味唔濃,芝士太稀疏唔夠濃厚,有待改善。 呢間火鍋店令我有啲失望,如果要食高質火鍋可以揀一啲大牌子火鍋店,如果想平可以揀連鎖快餐店嘅火鍋;飲品方面,喜茶已喺香港開分店,所以揀邊間飲品店,大家可以自己諗。 店名:湯•米 電話:27808210 地點:將軍澳唐賢街23號帝景灣商場1樓40號舖 營業時間:星期一至日11:30 - 16:00,18:00 - 22:30