話說呢間粉紅色少女風格嘅餐廳，小妹已經試過一次，不過由於閨密話未試過，而且佢嘅嘢食都唔差，所以就同佢試多次！點擊圖片放大 +2 上次嚟嘅時候，小妹係散嗌，今次就想試吓佢嘅Dinner Set「Bossy Royal Set」($388)，可以揀餐牌上兩款湯或沙律(各全份)、兩款小食(各半份)、一款主食(全份)同兩款漢堡、Pizza、意粉或燴飯(各半份)，不過部份菜式要另外加錢，好似小食拼盤、烤蒜蓉牛油龍蝦、龍蝦包等，大概加$15-$68不等，小妹覺得略嫌有啲貴，所以就冇考慮要加錢食，就揀咗啲唔使加錢嘅菜式。 前菜方面，我同朋友揀咗「蟹肉牛油果蘋果青瓜沙律」同是日餐湯「蕃茄濃湯」，前者蟹肉同牛油果好夾，Creamy中帶蟹肉嘅鮮甜，加埋青瓜同青蘋果，非常清新爽口；後者質感香濃軟滑，但小妹覺得稍稍酸咗啲。 小食方面，試咗「鮮果米紙捲．鮮蝦米紙捲」同「龍蝦芝士玉子燒」，前者同越式嘅米紙捲做法一樣，內有紅蘿卜、青瓜、鮮蝦同水果，同樣係好Fresh好清新嘅小食，配上柚子醋同乳酪汁一齊食，非常開胃；後者係軟滑玉子燒包住芝士龍蝦肉，雖然龍蝦肉比較少，但都好滋味。 主菜方面就叫咗「低溫慢煮三文魚．烤露筍．薯蓉．香草荷蘭汁」，小妹對於呢道菜期望好高，好可惜食落真係有啲失望，三文魚肉質嫩滑，味道卻較單一，三文魚、烤露筍、薯蓉都係冇味嘅食材，卻只有帶酸嘅香草荷蘭汁調味，令本來屬雪藏嘅三文魚略微帶腥同充滿雪藏味，着實有啲失望。建議加少少胡椒鹽調味。 意粉方面，嗌咗餐廳主打嘅「Lady煙肉蘑菇忌廉意大利粉配62度溫泉蛋」，呢個小妹之前已經食過，味道保持水準，詳情可參考小妹之前打嘅食評。另外又嗌咗個「流心芝士龍蝦三文治」，呢個水準頗高，麵包烤得香脆微焦，龍蝦肉超飽滿，配合香濃芝士，幾好味架！ 點擊圖片放大 +2 個Set其實唔包嘢飲，我同閨密每人嗌咗一杯嘢飲，我嗌嘅係熱嘅士多啤梨果茶，內帶士多啤梨果肉，聞落充滿果香，但飲落就帶酸，只因檸檬放得太多。閨密嗌嘅係Lady's Beer，類似《哈里波特》入面嘅奶油啤酒，蘋果梳打上面加一層奶蓋，飲落清爽唔甜膩。 成個Set有三項餐點係以放下午茶嘅三層架展示，非常Grand，估唔到晚餐都可以三層架一番！ 店名：Girlboss by Master Kama 電話：35831867 地址：荃灣大壩街4-30號荃灣廣場4樓432號舖 營業時間：星期一至日11:30 - 23:00 Blog：http://blog.ulifestyle.com.hk/blogger/shinysharon/ Facebook：https://www.facebook.com/hongkonggirl331
