日本拉麵可以話係我夜宵時份嘅Comfort Food，尤其係喺寒冷嘅冬天，嚟一碗熱騰騰嘅拉麵，真係幸福無比！並唔係人人都可以即刻飛去日本食拉麵，不過香港有幾間「過江龍」拉麵，大家唔使去日本，都可以食到東瀛嘅味道。 1)日本沾麵連鎖品牌＠三田製麵所 「三田特製拉麵」($78) 「三田」主打豬骨魚介同辛辣豬骨魚介兩款湯底嘅日式沾麵，湯底以大量豬骨、雞骨同多種蔬菜用12個鐘以上熬製。小妹對沾麵好感度唔大，所以同朋友試咗佢嘅「三田特製拉麵」($78)同「三田豚骨拉麵」($78)。前者多咗魚介，所以湯底香濃「傑」身好多，而後者則豬骨甜味重，兩者好味程度不相伯仲。「三田」嘅麵係自家製，以長野縣小麥粉同日本鹼水製成，每條粗度約為五毫米，比一般拉麵店嘅麵身粗，所以食落質感更結實爽彈。 「三田豚骨拉麵」($78) 點擊圖片放大 +4 店名：三田製麵所 地址：尖沙咀河內道18號K11購物藝術館地下G21-G22號舖 電話：25135311 營業時間：星期一至日11:00 - 01:00 ＿＿＿＿＿＿＿＿＿＿＿＿＿＿＿＿＿＿＿＿＿＿ 2)東京拉麵霸主＠麵屋一燈 「芳醇鹽味拉麵」($148特製版) 「麵屋一燈」連續5年被日本網民評選為日本東京Best Ramen及全日本No.1拉麵名店，亦係主打「濃厚魚介沾麵」，但個人認為佢嘅拉麵都唔弱，創新口味「芳醇鹽味拉麵」($148特製版)以精選新鮮雞隻慢煮成清雞高湯精華，配上干貝醬汁同鹽味秘製醬汁，帶出清雅醇香，特製版本更有兩份蛋同兩塊特製叉燒。 「柚子拉麵」($138) 而「柚子拉麵」($138)多咗一份清新感覺，同樣採用雞高湯，配合微帶甘澀嘅柚子醬油同特製灸燒厚切豚肉，肉質肥嫩，醬汁濃厚。而最煞食嘅係，尖沙咀店喺正維港隔離，可以睇住維港景色食拉麵，正呀！點擊圖片放大 +4 店名：麵屋一燈 地址：尖沙咀廣東道3-27號海港城海運大廈3樓LCX 32號舖 電話：31023299 營業時間：星期一至日11:30 - 22:30 ＿＿＿＿＿＿＿＿＿＿＿＿＿＿＿＿＿＿＿＿＿＿ 3)涉谷人氣拉麵@俺流塩らーめん 「俺流塩らーめん」分清湯同奶白色濃湯兩種，同樣以大量雞骨、豬骨同蔥熬製而成，「俺流塩湯拉麵」($59)係清湯，以慢火熬製雞骨同豬骨，逼出清新精華，清澈湯底配合拉麵食，夠晒清爽； 而「俺流熟成濃湯拉麵」($59)則係奶白色濃湯，主要係以壓力煲煮雞骨同豬骨，湯底香粘，一啲都唔膩。 而配菜選擇亦多，叉燒、半熟蛋、青蔥、白蔥、雲吞、炸雞件、餃子... ...想加咩都得！ 點擊圖片放大 +2 店名：俺流塩らーめん 地址：屯門屯門鄉事會路83號V City商場1樓19號舖 電話：21143388 營業時間：星期一至日11:30 - 22:00 ＿＿＿＿＿＿＿＿＿＿＿＿＿＿＿＿＿＿＿＿＿＿ Blog：http://blog.ulifestyle.com.hk/blogger/shinysharon/ Facebook：https://www.facebook.com/hongkonggirl331
