坐Cafe，從來唔係文青嘅專利，港女一樣係Cafe嘅常客，雖則唔係吟詩作對風花雪月，但打卡擺甫呃Like是常識，所以有特色嘅Cafe總係座無虛席。小妹今次想介紹兩間打卡程度達101％嘅Cafe，原因係佢哋有港女最愛嘅色系，一間Tiffany藍，一間公主粉，真係睇見都少女心大爆發！ １）Tiffany藍果撻專門店＠PdP Pies & Tarts 主打日式時令水果撻嘅PdP Pies & Tarts，位於人流旺區灣仔嘅利東街，一室Tiffany藍色令人不禁諗起某珠寶品牌。小妹係該品牌半個熱粉，加上呢間店推出下午茶Set，所以一定要同朋友去試吓！店內嘅果撻總類頗多，有士多啤梨、芒果、提子、雜果、藍莓... ...當然都會依水果嘅時令季節更改餐單，所以每次嚟都有唔同嘅驚喜。 門口一個大玻璃櫃都係色彩繽紛嘅果撻，勁吸睛！ 點擊圖片放大 +4 TIFFANY藍係主色調 每件撻單買價都$60樓上，但佢嘅Set就變相平咗好多，$208可以任揀三件果撻同2杯飲品，而且小妹可以試多啲味！ 今次小妹揀咗Mixed Berry、Mixed Fruit同Mango三種撻，Mixed Berry選用日本嘅藍莓、士多啤梨、紅桑子，所以食落酸甜開胃； Mixed Fruit就有齊鎮店水果，好似士多啤梨、藍莓、提子、奇異果、橙、香蕉等，色彩繽紛到令人唔知從何入手，但奇怪嘅係，啲青奇異果一啲都唔酸，令本來抗拒食奇異果嘅我都愛上； 至於Mango就清甜唔膩喉，非常Sweet！佢嘅餅底係牛油皮，焗出嚟頗鬆化，唔會死實實，非常香脆。 飲品方面，朋友揀咗Hojicha Latte，即係焙茶Latte，朋友係焙茶粉絲，一定捧場。朋友話焙茶香濃，完全冇畀咖啡味搶去風頭，加上奶味頗重，飲落濃滑。而我就飲Fruit Tea，內有乾嘅芒果粒同洋甘菊，飲落茶味唔濃，但帶有薄荷香氣。 店名：PdP Pies & Tarts 電話：36122654 地址：灣仔皇后大道東200號利東街地下G06及 F06A號舖 營業時間：星期一至日11:00 - 22:00 ________________________________________ ２）公主Pink少女味濃＠Girlboss by Master Kama 如果你唔鍾意高貴嘅女王式Tiffany藍，公主般可愛嘅粉紅色你又鍾唔鍾意呢？位於荃灣嘅Girlboss by Master Kama由店舖牆身、梳化、桌椅、抹手紙等，全部都用上粉紅色，睇到小妹心心眼！點擊圖片放大 +2 小妹嗌咗招牌「Lady煙肉蘑菇忌廉意大利粉配62度溫泉蛋」（＄９８），食物一上枱，小妹立即目瞪口呆，成碟意粉居然係粉紅色！估計係用紅菜頭調出嚟嘅顏色，煙肉帶燻香，蘑菇嫩口，配合芝士片、忌廉汁同溫泉蛋漿，非常香濃惹味！ 而「迷你芝士和牛漢堡」（＄９８）都係離唔開粉紅色，不過和牛就整得較乾身，略嫌唔夠Juicy，麵包亦有啲乾，味道同口感比較一般，但用嚟打卡就一流。隨Burger附送薯條，仲有Shake Shake粉同粉紅Shake Shake袋畀你Shake薯條！ 飲品方面，主打「Lady's Beer」（＄４８）味道同奶油啤相似，飲前要攪拌，攪完之後啲奶泡會好似火山熔岩爆發一樣湧出嚟，視覺上係一種如玩樂般嘅享受。點擊圖片放大 +2 店名：Girlboss by Master Kama 電話：35831867 地址：荃灣大壩街4-30號荃灣廣場4樓432號舖 營業時間：星期一至日11:30 - 23:00 Blog：http://blog.ulifestyle.com.hk/blogger/shinysharon/ Facebook：https://www.facebook.com/hongkonggirl331
