其實元朗美食唔係只有B仔涼粉、鬼巴士、田中壽司、又新街小食... ...元朗仲有好多選擇,久未發文嘅小妹最近試咗幾間元朗嘅食店,發現部份雖然唔出名,卻係食物有質素嘅窩心小店。 (1)衿貴花膠撈麵@漁民麵館 平時食港式麵,一係就車仔麵,一係就雲吞麵,最巴閉都係嗌碗燒鴨河,估唔到作為上等食材嘅花膠都可以親民貼地。呢間小店就非常落本,將燜好嘅花膠作為細麵嘅餸,非常衿貴。 花膠撈麵 小店採用北極鱈魚膠,食落幾有膠質,蠔油醬汁調校得鮮鹹得宜,都幾好食,但係小妹是日去嘅時候,花膠切得細碎,而且份量上亦冇搭枱嘅另一位客人多,似乎質量控制上較唔穩定,品質比較參差,但味道都係一流嘅。 至於甜品木瓜燉花膠則甜度控制得啱啱好,花膠香軟唔會帶腥味,秋天飲一碗非常窩心滋潤。點擊圖片放大 店名:漁民麵館 電話:N/A 地址:元朗擊壤路9號金寶大廈4號地舖 營業時間:星期一至日11:00 - 23:00 ___________________________________ (2)滋補暖心麻油雞@台灣私房菜 小妹入秋後就會好想食台灣嘅麻油雞,而元朗嘅呢間小店就有得食喇!味道雖然冇台灣嘅濃味,但係勝在有媽媽嘅味道,即係媽咪煮出嚟嘅健康味道——少鹽、少油、冇味精,不過呢度嘅麻油雞都重酒味,雞肉嫩滑,藥材亦足料得嚟唔會覺得難受,值得一試!燙青菜會淋上肉燥,好有台灣味道呀!點擊圖片放大 +2 店名:台灣私房菜 電話:26902929 地址:元朗安興街59號安泰樓地下5號舖 營業時間:星期一至四10:00 - 22:00,星期五10:00 - 23:00,星期六09:00 - 23:00,星期日09:00 - 22:00,公眾假期09:00 - 23:00 ___________________________________ (3)嫩滑霸王雞@過橋麵檔 住咗元朗十幾年,從未試過「過橋」出名嘅霸王雞!日前小妹同朋友一試,先知道咩叫鮮味。雞係一般切雞嘅做法,雞肉啱啱熟,食落嫩滑唔帶筋,雞皮爽脆,配合海量嘅炸蒜、蔥油、辣椒、雞汁鼓油一齊食,真係一試難忘! 朋友嗌咗個鮮果咕嚕肉,火龍果、菠蘿、桃等鮮果帶出香甜,令咕嚕肉更鮮甜有緻。 店名:過橋麵檔 電話:37058283 地址:元朗大坡頭徑2-12號華盛樓地下A舖 營業時間:星期一至日12:00 - 16:00,18:00 - 22:30 ___________________________________ (4)越南過江牛肉粉@錦麗 越南人氣牛肉粉專門店「錦麗」不動聲色落戶喺元朗,小妹唔行過Yoho真係唔知道,見咁多人排隊就湊吓熱鬧一試。 佢嘅牛肉湯頭真係鮮味十足,牛肉同牛骨嘅香味隨熱氣四溢,小妹叫嘅係綜合粉,有生牛肉、熟牛肉同牛丸,生、熟牛肉嫩口,牛丸彈牙,配合暖心牛肉湯底一齊食,非常好味。 另外又嗌咗法式牛油雞翼同大蝦扎肉米紙卷,前者一上枱就充滿牛油同蒜頭嘅香氣,雞翼炸得好透,就算擺咗好耐,食落都仲係脆;而後者則不過不失,未到驚艷處。點擊圖片放大 店名:錦麗 電話:28825180 地址:元朗元龍街9號形點2期1樓A161號舖 營業時間:星期一至日07:30 - 10:30,11:30 - 16:00,17:30 - 22:30 ___________________________________ Blog:http://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331