有「海底黃金」之稱嘅海膽絕係小妹最愛嘅美食之一，尤其係日本新鮮即開海膽，嗰種鮮甜滋味真係令我一世難忘！香港都有特別為海膽迷而設嘅食店，推出爆多海膽丼飯，滿滿一碗真係震撼人心！ （１）旺角長龍「爆丼屋」 「爆丼屋」位於旺區旺角，日日門口都排晒長龍，原因係佢嘅丼飯好有睇頭！ 三色海膽丼（＄２３８）以大堆頭示人，勢要「海膽打人牙骹軟」！呢個丼用咗三種海膽，接近1板韓國紫海膽、1/4板北海道馬糞海膽同70g加拿大海膽，小妹見到成碗金黃色真係攞晒膽，雖然冇日本嗰啲咁鮮甜，但海膽味濃，真係食完一啖又一啖！不過是日小妹發現唔到有加拿大海膽，而馬糞海膽似乎唔當季，味道唔夠甜，但係要過吓豪食海膽癮都可以試吓！點擊圖片放大 +4 另外赤蝦海鮮盛丼（＄９０）亦都好值得試，兩隻赤蝦都有成支筷子咁長，肉質鮮甜彈牙，仲有三文魚、帶子同蟹柳，唔使＄１００就食到！提提大家，Lunch Set有沙律同湯，會抵啲架！點擊圖片放大 +3 店名：爆丼屋 電話：23322918 地址：旺角豉油街50號地下8號舖 營業時間：星期一至日12:00 - 02:00 ＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿ （２）尖咀高質丼「鉄火堂」 同樣有三色海膽丼（＄２２８）嘅「鉄火堂」位於開飯勝地尖沙咀，價錢比「爆丼屋」平少少，份量雖亦少啲啲，但海膽甜味略勝一籌！三色海膽丼同樣用咗北海道海膽、加拿大海膽同韓國海膽，是日小妹到訪，真係用晒三隻海膽，童叟無欺。當中以北海道海膽最甜，加拿大海膽味濃Creamy，而韓國海膽就稍苦澀回甘，三者平衡，令層次增加！點擊圖片放大 好友熱愛三文魚，嚟一客三文魚四色丼（＄８８），包括火灸三文魚、三文魚刺身、碎蔥三文魚同三文魚籽，呢個價錢有齊四種呈現三文魚嘅方法，認真抵食！ 點擊圖片放大 +5 店名：鉄火堂 電話：26622551 地址：尖沙咀厚福街10號地舖 營業時間：星期一至日12:00 - 00:30 ＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿ Blog：http://blog.ulifestyle.com.hk/blogger/shinysharon/ Facebook：https://www.facebook.com/hongkonggirl331
