最近小妹去咗一間位於深水埗嘅懷舊冰室,門面同一般茶餐廳無異嘅佢,入面嘅設計同裝修竟然別有洞天!舊式電話、手繪美女電影宣傳海報、唐樓郵箱、霓虹燈箱、「內有雅座」舊式標語等迅即映入眼廉,感覺就好似返咗去七、八十年代嘅舊香港!點擊圖片放大 +2 而最令小妹驚喜嘅係芝士撈丁,一份「芝士雞排撈一丁」,海量芝士佔滿成碟公仔麵,連雞排嘅蹤影都見唔到,真係令我大開眼界!將芝士同麵撈埋一齊,芝士嘅份量足以掛滿每一條公仔麵,令每一啖麵都可以食到芝士嘅香濃滋味,對於芝士狂迷嚟講,係絕對唔可以錯過嘅!小妹覺得佢嘅芝士濃滑唔會過膩,配合烤得啱啱熟嘅雞排,的確係一個令人滿足嘅午餐或者晚餐。 小妹同朋友都有嗌其他嘢食,好似茄牛通、炒滑蛋、豉椒雞翼等,味道合符一般茶餐廳水準,但唔夠芝士撈丁驚艷,但作為佐餐小食,亦未嘗不可。 店名:良記餐廳(老鳳冰室) 電話:26608136 地址:深水埗基隆街216號地舖 營業時間:星期一至日07:00-22:00 Blog:http://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331