話說小妹某個愛酒同事，知道The Sky Bar推出紅、白、啤酒兩小時任飲之後，即刻約我同一班同樣愛酒嘅同事一齊去「買醉」，只因佢Menu上除咗有各款紅、白、啤酒之外，連Sparkling Wine、Cocktail、Mocktail同各種酒款都提供，齋睇真係覺得抵。 我哋去咗位於旺角朗豪坊嘅分店，因為一早Book咗位，所以一嚟到就有位坐，餐廳安排咗一個大嘅梳化座畀我哋，而且旺中帶靜，適合傾偈之餘又可以感受吓人群氣氛。我哋一行五人一坐低就每人嗌一杯Sparkling Wine，唔使兩分鐘，酒就上枱了，速度奇快，我哋即刻情緒高漲，激讚有質素！ 話明係愛酒之人，飲酒嘅嘢「依思執」，話都冇咁快就飲晒，於是五個人第二Round就嗌咗三杯紅酒、兩杯Cocktail，Cocktail上得都好快，但三杯紅酒就足足等咗半個鐘！係半個鐘！紅酒唔似Cocktail要沖調，齋倒落個杯度都可以倒半個鐘？其實等咗十分鐘已催過一次單，有個男侍應話水吧好忙，有好多單Jam住咗，於是我哋又等咗十分鐘，個男侍應話整緊，但我哋竟然見到其他人自己出去拎酒，一張枱每人有成三杯酒，不過都算，我哋等多一陣，但見到隔離枱入座無幾耐，遲過我哋落單，竟然上咗酒，見到咁，小妹真心嬲，於是再問男侍應有冇漏單，佢態度好差咁話落咗，出面水吧忙到甩轆，仲叫我哋有咩同經理講，於是同事就直接搵經理，經理後來覆話冇落到單，仲不停Say Sorry，跟住即刻奉上酒。 杯紅酒等到小妹頸都長 感覺呢單嘢有啲奇怪，我相信男侍應唔會連自己有冇落單都唔知，佢態度差係一個問題，但能力呢樣嘢唔會有問題啩？唔通落咗Cocktail唔落埋其他？加上要沖調嘅Cocktail上得咁快又點解釋？我又發現有啲枱看似唔係任飲 ( 因為任飲有個牌Label )，但上紅、白酒速度超快，所以實情係點大家自己想像。 另外，網媒宣傳稿上面顯示嘅酒Menu係咩都有，但係嚟到張餐單係咩都冇，例如紅、白酒本來各自都有兩種款揀，點知去到見到得一種；本來Vodka、Rum、Gin、Whisky係有嘅，但去到全部都冇提供；連啤酒同部份Cocktail、Mocktail都冇埋，伏唔伏真係見仁見智。 傳媒本身Show嘅Menu (截圖自U Magazine) 我哋去到嘅Menu，真係有圖有真相呀~~ 另外，同事嗌嘅Cocktail糖水味極濃，而且啲果味好假，層次單調，得個死甜，唔建議嗌。 不過值得一讚嘅係，餐廳食物有優惠Menu，比起正常Menu抵超多，份量大之餘，味道都唔差，尤其係墨西哥卷，甜酸中帶微辣，非常開胃。而其他食物都唔差，配酒真心唔錯。 墨西哥卷真心好食，我哋嗌咗兩碟 點擊圖片放大 之後我哋又嗌咗兩Round酒，小妹總共飲咗三杯Sparkling Wine同一杯紅酒，講真，飲4杯酒出面起碼二、三百，所以真係回晒本！如果中間唔係有段小插曲，成餐飯可以畀一百個Like！ 店名：The Sky Bar 地址：旺角亞皆老街8號朗豪坊13樓1號舖 電話：3514-4448 營業時間：星期一至四、星期日 15:30 - 01:00，星期五至六、公眾假期前夕 15:30 - 02:00
