雖然哈利波特首部曲出版至今已經有21年歷史,但係呢股魔法熱潮依然冇退卻,「路摸思」、「速速前」、「整整石化」、「溫加癲啦唯啊薩」呢啲魔法咒語,魔法迷們依然朗朗上口。早前香港開咗間以魔法為主題嘅Café,由於店主本人係個「哈利迷」,有啲珍藏想同大家分享,所以先開咗呢間Café。 小妹唔係「哈利迷」,但對於主題Café非常好奇,覺得可以滿足獵奇心態,睇吓啲得意嘢,於是就同兩個閨密一齊去體驗一下魔法世界。由於小妹比較少行旺角,對於旺角嘅街道唔熟悉,所以超難先搵到確實位置,原來間Café係隱藏喺一條街市嘅商業大廈入面! 一出笠口,就見到門口有一個入咗一半牆嘅行李推車同雀籠,令人即刻諗起哈利同榮恩佢哋每個學期初都要推住行李衝入去火車站幅牆度。推門入去,店員會非常友善咁歡迎你,令你覺得非常窩心。入面嘅陳設全部都係電影入面見過嘅產品,魔杖、哈利嘅飛天掃把──光輪二千(令人不禁諗起魁地奇比賽)、魔法書、地球儀、古典壁畫,仲有半架穿緊紅牆去9 3/4號月台嘅行李車同天花板嘅催狂魔!全部都呈現咗電影入面見到嘅畫面,搞到小妹同朋友瘋狂Selfie! 點擊圖片放大 +6 由於我哋有三個女仔,所以每人嗌咗一樣嘢Share,呢度嘅嘢食全部都用小說入面出現過嘅角色作為菜名,非常有趣。奴似「中國火球龍」($98)係「辣味蒜香三文魚意粉」,食落意粉唔過腍,醬汁微辣,三文魚雖然過熟鞋口,但配合蒜香汁,非常惹味。記得中國火球龍喺三巫大鬥法入面出現過,負責守衛金蛋,但被維克多.喀浪用眼疾咒令佢暫時失明攞得金蛋,可惜一半金蛋被踩碎,令佢被扣分。 另一款係「吹狂魔之吻」*($138),大家都知道「催狂魔」會吸走人嘅快樂同靈魂,令人留低最痛苦嘅回憶同感受,當然呢味餸完全唔會吸走你啲快樂啦,佢只係「紅酒燴牛尾」!牛尾燜得夠腍入味,醬汁香濃,只可惜冇法包相配,有啲寡,但味道唔差。 再者就係「跳跳菌」($82),雖然冇印象哈利波特入面有呢樣嘢,但其實佢係「牛肝菌意大利飯」!不過小妹覺得呢個飯堅好食,香濃嘅牛肝菌醬包裹住每粒飯,令人每一啖都食到濃郁嘅牛肝菌味,飯嘅濕度、軟硬度拿捏得啱啱好,所以小妹都忍唔住食多幾啖! 除咗嘢食,飲品都融合咗電影,例如必飲嘅「Butter Beer奶油啤」($48),講係啤酒,但其實完全零酒精,只係忌廉汽水On Top一層芝士忌廉奶泡,估唔到超級好飲,超級爽,飲完上唇會沾上奶泡,影張相就非常可愛!另外仲嗌咗「愛情魔藥」($55),係士多啤梨乳酪梳打,飲落酸酸甜甜,易入口,少女最愛! 其實小妹去之前都有睇過其他人嘅食評,好壞參半,所以去之前都預咗係「好睇唔好食」嗰啲Friend,但試完之後反而有驚喜,所以大家可以上去試吓,如果唔啱你口味,單係影相呃Like都抵番! P.S走嘅時候,老闆仲同我哋估魔杖同玩小遊戲,店員仲特登幫我哋影相,超級Friendly,超級Nice! *「催狂魔」的「催」字為正字,非「吹」,店舖菜牌名稱有誤。 店名:9 3/4 Café 電話:94326555 地址:旺角煙廠街9號興發商業大廈4樓404室 營業時間:星期一至日14:30-16:30,18:30-23:00 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331