踏入秋冬季,就會開始不停想食嘢,身體話你知:「你要儲足脂肪過冬喇!」但對於小妹嚟講,呢個係一個魚與熊掌嘅抉擇,又想Keep住身形,又想食嘢,但係難得冬天嚟到,又有大褸遮住,Keep Fit嘅嘢,遲啲先講啦! (1)吮手指蝦煲+補身麻油雞@蝦棧 秋冬一定要暖身同滋補,位於太子嘅「蝦棧」就可以滿足晒呢兩種願望!尤其係主打嘅暖笠笠蝦煲($188/鍋),即撈300gm大頭蝦,口味超級多,有奶油、椒鹽、胡椒... ...小妹最鍾意胡椒味,叫咗一煲,300gm大概有6至8隻,視乎蝦嘅大細而定,而小妹嘅呢一煲有大有細,所以只有6隻,有啲Sad,因為小妹係大頭蝦粉絲,超級鍾意食佢啲膏同啖啖肉,始終感覺份量太少。不過有啲蝦都頗大隻,而且又爆膏,食到小妹不停吮手指。 胡椒蝦煲($188/鍋) 爆多膏 另外仲有「台式黑麻油雞」($168),雞肉好嫩,麻油同酒嘅比例恰到好處,食起上嚟暖笠笠,比起食濃味雞煲更加滋補養生。 「台式黑麻油雞」($168) 仲有「樹子冰菜」($98),冰菜喺香港比較少有,要睇季節性,既然見到有就嗌咗一碟,只係估唔到用台式醃料樹子炮製咁好味。 「樹子冰菜」($98) 店名:蝦棧 電話:28277728 地址:太子花園街233-235號偉雄大廈地下A舖 營業時間:星期一至日12:00-22:30 _________________________ (2)蟹粉突襲@上海姥姥 今年大閘蟹供港困難重重,望穿秋水,等到啲蟹好唔容易嚟到香港,價錢都令你個心涼咗半截,食蟹Mood即刻急降,因為供港時間遲咗,所以好多酒店都冇咗放題,小妹今年冇得大快朵頤,惟有少有少食。「上海姥姥」突然推出蟹粉系列,小妹即刻心心眼。自從喺上海試過當地嘅蟹粉豆腐之後,就一直好掛住,而呢度嘅「蟹粉豆腐」($128)同上海比,反而比上海嘅濃味,蟹粉足但芡汁較濃,如果可以清返少少,會冇咁漏。 「蟹粉豆腐」($128) 至於「蟹粉拌麵」($98)就非常Yummy,蟹粉多到呢,每注麵都掛上香濃大閘蟹膏,真係齒頰留香。 隨麵附送嘅雞湯 食咁多濃味嘢,一定要嗌啲清淡嘅平衡吓,「菜肉雲吞」同「上海小籠包」皮薄餡靚,值得一試。點擊圖片放大 店名:上海姥姥 電話:25879118 地址:銅鑼灣百德新街22-36號翡翠明珠廣場1樓7號舖 營業時間:星期一至日12:00-22:30 _________________________ (3)邪惡版西餐@URBAN Cafe Commune 好「西」一定要夠邪惡,Burger、意粉、薯條、烤雞、牛排... ...有邊個可以抵擋?「URBAN CAFE」以玩味Fusion西餐做主打,佢嘅「URBAN 3小時慢烤法國肥雞」($168)都幾值得一試,不過得二分一隻,邪惡極有限。 「健力士黑啤青口」($158),雖然係大隻版,唔係Baby版,但隻隻都嫩口,唔會「鞋」,黑啤Sauce配上薯條食,係致肥重點。 「一山不能藏二虎蝦意粉」($158),雖然話係一山不能藏二虎蝦,但碟意粉都有兩隻蝦,個名只係好玩而已,用意大利蛋整成嘅90mm闊條麵,再加上香辣車厘茄醬,非常惹味。 而最特別嘅係,URBAN竟然用大閘蟹入饌,「大閘蟹大大力花雕蟹皇意粉」($238)中西合壁,用蟹粉、魚子醬、醋薑炮製意粉,蟹粉同魚子異常夾,味道香濃,再配上一杯中國話梅花雕酒,感覺好似喺歐洲食緊中國菜咁。點擊圖片放大 +2 龍蝦南瓜湯 店名:URBAN Cafe Commune 電話:25360915 地址:元朗元龍街9號形點一期1樓1030A號舖 營業時間:星期一至日08:00-22:00 _________________________ (4)期間限定「頭水紫菜」@莆田 踏入11、12月就係水紫菜盛產嘅季節,「莆田」捉緊機會,推出頭水紫菜系列,頭水紫菜係指第一次長成嘅紫菜,頭次採割,叫頭水紫菜。「蝦苗拌頭水紫菜」($52)係前菜,以涼拌方式烹調,酸酸哋非常開胃,搭配獨有嘅紅尾蝦苗,鮮味十足,可惜份量有啲少! 「莆田荔枝肉」($88)用咕嚕肉做法烹調,酸酸甜甜,不過由於落得太多紅蔥頭,蔥頭味蓋過肉味,略顯失色。 「瑤柱燴絲瓜」($78)頗為清淡,本來預計會食到鹹香味,但落差太大,瑤柱發到冇晒味,絲瓜同白灼冇分別,呢味餸值唔值得試就見仁見智。 「大白菜燉軟豆腐」($109)用料頗豐富,有軟豆腐、大白菜、菇、蟶子等,鮮味十足,非常暖胃!點擊圖片放大 店名:莆田 電話:31884850 地址:元朗元龍街9號形點一期2樓2040號舖 營業時間:星期一至日11:30-16:00,17:30-22:30 _________________________ (5)「人氣」中式甜品@滔滔甜品 話說小妹去呢間甜品店嘅時候正值啱啱營業嘅階段,門外逼滿晒人,因傳統中式甜品捧場客唔少,加上啱啱入秋,自然客似雲來。不過呢間甜品店嘅甜品風頭勁,但味道真係好一般,睇到呢度你可能會問:「咁你又介紹?」我只可以話,唔一定好食先介紹,唔好食都可以同大家分享,等大家決定試唔試,明將夠劣食啦,咪有一大班人去以身試法出文分享。 講番轉頭,呢間甜品店嘅甜品偏淡,好似唔係好落糖咁,製作亦偏向簡單,好似碗「滔滔雜崩冷」($28),雖然料多,咩都有啲,但係味道堅係淡,啲料好似用水白烚咁,頗為失望。 而主打「桑寄生蓮子蛋茶」($20),我Prefer主打應該有啲料到,但飲落得桑寄生味濃郁,蓮子煲得唔夠腍,蛋似係臨上枱先擺入糖水度,唔夠入味。小妹食過源記嘅桑寄生蓮子蛋茶,蓮子煲得香腍,蛋入味香甜,桑寄生茶香濃順喉,認真一試難忘,睇嚟甜品店想做出完美嘅中式甜品,要再進修一下喇!點擊圖片放大 店名:滔滔甜品 電話:N/A 地址:元朗康樂路8號康樂廣場地下9號舖 營業時間:星期一全日休息,星期二至日16:30-01:00 Blog:https://blog.ulifestyle.com.hk/blogger/shinysharon/ Facebook:https://www.facebook.com/hongkonggirl331