去得台北，大家一定會瘋狂食嘢同買嘢，但行到攰、覺得口渴嘅時候，你係咪都想搵個地方休息一下，歎番杯嘢飲呢？小妹今次將試過嘅飲品店集結，總結７間都幾值得去嘅小店！ （一）好氏研究室 以實驗室作為主題嘅好氏研究室，係近年台灣年輕人最鍾意打躉嘅Cafe之一，店內一室純白，以動植物標本、醫學用骷髏骨頭標本、實驗室器具等打造成一間玩味Cafe。店內提供嘅飲品全部都以燒杯、錐形瓶、試管、滴管 、燒瓶等盛載，非常好玩！「白乳香奶茶」以燒杯盛載冰茶，再用細燒杯裝糖漿同奶，並附上攪拌棒及量杯，畀客人自己調校合適口味嘅奶茶，過程真係好似做實驗咁！店內亦提供輕食，好似「研究室輕食」就係烤餅配蕃茄莎莎醬同乳酪醬，非常清新可口！點擊圖片放大 +4 白乳香奶茶 柚子茶 研究室輕食 店名：好氏研究室 地址：大安區溫州街48巷22號 電話：0223620723 營業時間：星期一全日休息，星期二至日12:00-21:00 ＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿ （二）SKINFOOD 西門概念咖啡廳 近年好多韓國美妝品牌不但致力打造美妝王國，更將之與Cafe結合，成為唔少少女嘅熱捧對象，好似SKINFOOD咁，美妝自然受歡迎，而佢嘅Cafe一樣受少女喜愛。呢間位於西門町鬧市嘅Cafe，同韓國店一樣，樓下賣化妝品、護膚品，樓上打造成Cafe，等女士們Shopping到攰就可以歎番杯嘢飲。飲品都係以護膚品嘅清新形象打造而成，好似「草莓氣泡水果飲」就令人諗起佢嘅莓果系列，「蜂蜜柚子茶」就令人諗起濟洲柚子系列。除此之外，Cafe入面嘅化妝品仲可以任用，等大家靚住走！ 點擊圖片放大 化妝品任用 點擊圖片放大 草莓氣泡水果飲 蜂蜜柚子茶 店名：SKINFOOD 西門概念咖啡廳 地址：萬華區武昌街二段85-3號2F 電話：0223825168 營業時間：N/A ＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿ （三）二條通一號．綠島小夜曲 二條通一號係由一間擁有百年歷史嘅木屋活化而成，最大特色係門前一棵參天大樹，鍾意享受日光浴嘅朋友可以坐喺室外大樹下曬太陽，怕熱但又想同陽光玩遊戲嘅朋友可以坐喺大門隔離嘅窗邊位，如果想涼啲就可以坐喺室內嘅木製桌椅悠閒Hea吓，飲杯咖啡，食件Cake，不過比較可惜嘅係，門前大樹呢幾個月都光禿禿，想喺樹下乘涼可能要再等一排。點擊圖片放大 +2 窗邊座位係我嘅最愛 店名：二條通綠島小夜曲 地址：中山區中山北路一段33巷1號 電話：0225314594 營業時間：星期一至日12:00-21:30 ＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿ （四）八拾捌茶輪番所 呢間舖可以話係喺西門町鬧市入面嘅一片靜土，輪番所係指持廟（西本願寺）住持嘅住所，於1924年落成，店舖將之活化成茶室，供人品茗。店內主要供應日本茶同日本果子，客人可以坐喺塌塌米上優雅品茗，真係人生一大樂事！ 店名：八拾捌茶輪番所 地址：萬華區中華路一段174號 電話：0223120845 營業時間：星期一至五13:00-21:00，星期六至日10:30-21:00，公眾假期10:30-21:00 ＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿ （五）花甜果室 開喺民居入面嘅「花甜果室」，可謂隱世嘅新式台式飲品店，飲品唔單止色彩繽紛，而且以花做材料，非常吸睛！小妹試咗一杯「藍色，是你的顏色」，係店內惟一一杯有酒精成份嘅飲品，天藍色嘅沙冰，以荔枝、番石榴、蘋果、蜂蜜、伏特加、百里香，再加上蝶豆花打造而成，飲品上撒一啲食用花，微醺中富層次，非常值得一試！店中有一張長椅，行到攰可以休息一下，舒服晒！點擊圖片放大 +3 店名：花甜果室 地址：大安區敦化南路一段160巷40號 電話：0227110234 營業時間：星期一至四12:00-21:00，星期五至六12:00-21:30，星期日12:00-21:00 ＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿ （六）Meat Up 以色彩鮮艷同新鮮水果見稱嘅「Meat Up」，主打一杯杯極邪惡同罪惡感深重嘅沙冰奶昔，簡約文青Feel嘅裝潢令人坐到唔想走！點擊圖片放大 店名：Meat Up 地址：萬華區武昌街二段124號之4 電話：0222314200 營業時間：星期一至日10:00-22:00 ＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿ （七）春水堂 春水堂可謂台北珍珠奶茶界嘅名牌，佢出名珍珠有咬口，茶同奶比例恰當，比起一般街邊嘅茶店比較冇咁甜膩，自然受到一眾奶茶迷追捧。點擊圖片放大 店名：春水堂 地址：中正區忠孝西路一段66號B2 電話：0223315718 營業時間：星期一至四11:00-21:30，星期五至六11:00-22:00，星期日11:00-21:30 Blog：https://blog.ulifestyle.com.hk/blogger/shinysharon/ Facebook：https://www.facebook.com/hongkonggirl331
