好多人去台北,食嘅嘢不外乎係鹽酥雞、大腸包小腸、鹵味、鹽水雞、麻辣火鍋呀咁,有冇諗過盛產水果嘅台北,佢嘅水果派同水果撻一樣做得出色?小妹早前去咗台北,走訪咗3間專門以賣水果派同撻嘅小店,希望同大家分享寶島帶嚟嘅甜美風情! (1)文青式果撻@貳房苑 以賣水果撻同冷拌麵聞名嘅「貳房苑」,以綠色植物裝飾門面,驟眼睇以為係平常人家嘅屋企,但原來係一間文青Cafe,由於位於大安小區入面,幫襯嘅都係附近嘅文藝青年,唔受遊客污染,所以店入面份外安靜寫意。店內有一列冰櫃,陳列各種是日推薦嘅時令水果撻(價錢由$250至$280不等),小妹特別試咗「清新荔枝撻」同「愛文芒果撻」,全部都用台灣新鮮水果製造,清甜可口,非常適合喺夏天食。尤其係芒果撻,選用台灣愛文芒果,清甜度達十級!小妹亦試咗主打嘅「洋流 南投梅醬山藥蔬果鮮拌冷麵」($180),梅汁微酸,蔬果鮮甜,食落冰涼清爽。 愛文芒果撻 清新荔枝撻 「洋流 南投梅醬山藥蔬果鮮拌冷麵」($180) 飲品方面,小妹試咗「回眸一笑 阿里山紅烏龍」($280),甘爽醇厚嘅紅茶同回甘嘅烏龍可解甜品嘅甜膩,而「福爾摩莎 果苑紅茶」($230)亦酸甜有致。 「回眸一笑 阿里山紅烏龍」($280) 「福爾摩莎 果苑紅茶」($230) 點擊圖片放大 +4 店名:貳房苑 電話:886 2 2755 3039 地址:台北市大安區瑞安街23巷14號 營業時間:星期一至日:11:30 - 21:00 ________________________________________________________ (2)小島熱帶風情@PonPie澎派 有名你叫「PonPie澎派」,當然係以「派」出名,台灣人幫襯都係成個成個咁買,但如果想試多啲口味,逐件買會好啲。「PonPie澎派」嘅水果塔色彩繽紛,甚有熱帶風情,「密瓜假期」($130)係以新鮮密瓜、香草牛奶打造而成,食落香甜爽口。「早安!橙之美塔」($130)則以甜橙、葡萄柚同香草芝士製成,素知台灣柳橙出名甜,再加上葡萄柚香氣撲鼻,又係一消暑甜品!不過小店座位有限,就算Book咗枱都要等,所以早啲Book枱早啲去著數啲! 「密瓜假期」($130) 「早安!橙之美塔」($130) 點擊圖片放大 +4 店名:PonPie澎派 電話:886 2 2272 2224 地址:新北市板橋區民權路202巷4弄1號 營業時間:星期二至日:12:00 - 20:00,星期一休息 ________________________________________________________ (3)Tiffany Blue人氣派店@Bonnie Sugar Tiffany Blue嘅門面係小店嘅集郵熱點,小店內以乾花乾草點綴,文青味甚濃,而店內滿冰櫃嘅彩色水果派同水果撻更加令少女們心心眼!嚟到呢度,第一件要學嘅就係選擇,因為幾十款甜品真係會令你有選擇困難症!小妹好難得先喺眾多甜品入面揀咗三款,最吸睛嘅一定要數「水蜜桃小塔」($280),個名叫小塔,其實一啲都唔小,原個新鮮水蜜桃置喺牛油忌廉撻上面,真係份量十足!「葡萄柚大派」($220)則滿鋪微甜回甘嘅新鮮葡萄柚,啖啖柚肉,食落唔會太漏。「香甜無花果小塔」($250)則香甜無比,從來唔知道新鮮無花果係咁清甜好食,配上杏仁奶油、吉士醬、莓果醬一齊食,簡直係人間美味!走訪小店當日遇上有派對訂派,一室果撻果派鋪滿桌子,真係令小妹大開眼界,原來台灣人對水果派同撻咁著迷! 「水蜜桃小塔」($280) 「葡萄柚大派」($220) 「香甜無花果小塔」($250) 飲品方面都好夏日,「繽紛水果雪球氣泡飲」($180)以水果製成冰球,放入氣泡梳打入面,活如一杯彩虹特飲,夏天飲番杯,爽呀! 「繽紛水果雪球氣泡飲」($180) 英式紅茶($160) 點擊圖片放大 +10 店名:Bonnie Sugar 電話:886 7 221 1345 地址:台北市中正區北平東路9號 營業時間:星期一至日13:00 - 21:30