話說小妹好耐冇打Blog，終於有時間分享一篇食記，就決定打一篇有關元朗好值得試嘅隱世餐廳，等一眾朋友仔可以入元朗尋幽探秘一下！ （１）平民價日式石燒吉列牛（The Backstreet Kitchen） 石燒吉列牛小排定食（$138） 石燒一口牛肋肉定食（$128） 呢間專門食吉列牛小排嘅日式小店，好早之前已經被各大飲食傳媒廣泛報導，雖然每晚門口都排滿人，但係由於地理位置太隔攝，附近又冇乜地方可以行，所以一直都好難吸引新界以外嘅食客支持。不過佢就好受元朗區食客歡迎，只因係「平民價錢，一級享受」，以石燒吉列牛小排同石燒一口牛肋肉作為主打， 石燒吉列牛小排定食（$138）選用用美國安格斯牛小排，薄切成一啖大細，經210度高溫油炸之後上枱，供客人放喺高溫燒熱嘅石板上面煎約10秒，即刻鎖住肉汁，食落外皮鬆脆，內裡軟腍豐腴，配上特設嘅Wasabi山椒粉、七味粉特調嘅蒜蓉同牛肉燒汁，一個字形容「好正」！而石燒一口牛肋肉定食（$128）就有成16塊牛肋肉，質感嫩滑，口味濃郁，食完勁想再Encore！店主自創嘅橫丁飯都係一個亮點，珍珠米配生薑燒肉汁、自家製黑白芝麻、櫻花蝦乾、木魚粉、紫菜，超級香口，加埋菊花狀豆腐蕃茄湯清清味蕾，黯然消魂呀！ The Backstreet Kitchen 電話：6272 7271 地址：元朗合益路9-15號紀業樓地下H號舖 營業時間：星期一至二、星期四至五: 11:30-14:30;18:00-22:00，星期六、日及公眾假期: 11:30-16:00;18:00-22:00，星期三: 休息 __________________________________________ （２）豐富豬扒碟頭飯（天奴豬扒餐廳） 黑椒豬扒蛋飯（$49） 喺元朗區出晒名嘅「天奴」，又係開喺啲隔攝巷仔，唔係地膽真係唔知道有佢嘅存在，雖然幫襯嘅通常都係男人，貪佢大大碟，飽肚又抵食，但係作為小女子嘅我都一樣冧佢嘅豬扒飯（$49），只因佢嘅豬扒非常軟滑Sweet，食落又唔覺肥膩同油，毫無邪惡感覺，只因佢煮法同一般茶記有別，工序多自然唔會肥到出油！小妹最鍾意佢個燒茄子，同樣香甜軟腍，再加隻荷包蛋，簡直係「Perfect馳」！ 天奴豬扒餐廳 電話：2442 2997 地址：元朗昌盛徑18號元通樓地下 __________________________________________ （３）小清新台式食店（真台客） 台式炸雞便當（$48） 魯肉飯便當（$48） 以小妹金魚般嘅記憶，呢間食店好似開咗大半年到，主打台式餐點，老闆係台灣人，喺台灣有幾間分店，但首次打入香港市場就入元朗開店，而且仲要喺唔起眼嘅巷弄落戶，未免有啲冒險，不過食物勝在夠地道，只要講得出嘅台式食物都可以喺度食到，如台式便當、甜不辣、鹽酥雞等，就好似個台式炸雞便當（$48）咁，大大份炸雞香脆可口，配埋滷蛋、青瓜同醃黃瓜，仲唔係台灣嘅味道？再加埋一室嘅原木裝潢同落地玻璃，完全係台灣文青最愛嘅清新小店格局。 涼拌小黃瓜（$28） 紫菜蛋花湯（$30） 荔枝紅茶（$18） 古早味冬瓜茶（$20） 點擊圖片放大 +2 真台客 地址：元朗仁樂坊5號利發大廈地下G及F號舖 __________________________________________ （４）嚴冬暖胃揮手區（味仟店） 滋味毛家鮮雞煲仔飯（$54） 魚香茄子煲（$47） 馬拉盞炒通菜（$45） 雞肉串燒（$9/串） 雖然冬天啱啱過去，但係近呢一個月天氣都唔多穩定，明明熱到抽筋，突然又跌幾度凍一凍，又會好想食暖胃食物！元朗嘅炭火煲仔飯店寥寥可數，但呢間舖做咗好多年都仲係堅持用炭爐燒煲仔飯，認真夠用心，小妹食過炭火同爐火燒出嚟嘅煲仔飯，炭火嘅明顯香口同滋味好多，所以一到冬天就會去呢間舖打躉，就算要等成個鐘都願意（因為有時真係好多人，尤其係天氣凍嘅時候）！ 味仟店 電話：2449 3962 地址：元朗安興街40號地下 __________________________________________ （５）明火熬二十幾個鐘嘅豚骨拉麵（焰拉麵 ） 焰（$78） 鮮焰（$78） 元朗拉麵小店多不勝數，但呢間拉麵店主打嘅「焰」拉麵（$78）就真係嚇我一跳，點解咁驚嚇？原因係佢個湯底熬足廿幾個鐘，超級濃郁！「焰」係傳統豚骨湯拉麵，以明火熬十幾個鐘，再用棉被蓋過夜，之後再熬多十幾個鐘，令豚骨精華化晒入湯，難怪拌麵食時感覺到好多膠質喺個口度！而「鮮焰」（$78）就係加咗海鮮做湯底，飲落多咗一股鮮甜味！點擊圖片放大 焰拉麵 電話：2503 0022 地址：元朗教育路83號地舖 營業時間：星期一至五: 12:00-15:00; 18:00-21:45，星期六及日: 12:00-21:45 __________________________________________ （６）尼泊爾特色Fusion菜（ME'N'U Homemade Fusion） 尼泊爾青木瓜沙律（$78，另加$18加5隻虎蝦） 燒肋骨（$128/半份） 燒雞肉卡巴（$78） 咁大個女從未試過食尼泊爾菜，咁啱元朗開咗間，就去試試！雖然唔知尼泊爾菜係點嘅，不過食落都係我鐘意嘅東南亞菜味道，重香料同味道濃，如尼泊爾青木瓜沙律（$78，另加$18加5隻虎蝦）、燒肋骨（$128/半份）、燒雞肉卡巴（$78），部份菜式結合西式方法烹調，好啱鍾意Fusion菜嘅人，加上食店裝潢充滿中東特色，勁有Feel！點擊圖片放大 +2 ME'N'U Homemade Fusion 電話：2788 2638 地址：元朗元朗安寧路76號地舖 營業時間：星期三至一: 11:30-22:30，逢星期二休息 __________________________________________ Facebook：https://www.facebook.com/hongkonggirl331/ Instagram：http://www.imgrum.net/user/hongkonggirl331/2549505907
