想食高質素嘅美國菜,唔一定要去美國,身處元朗一樣可以食到平、靚、正嘅美菜!呢間位於元朗西菁街嘅西餐廳,就係主打漢堡包、牛扒等美式風情美食,令一眾「美菜控」瘋狂! 是日好友相約小妹飯敍,佢話元朗開咗間充滿美式酒館風格兼帶有文青Style嘅西餐廳,連小妹都唔知有呢間舖,梗要一試!一踏入門口,果然幾「骨緻」,原木桌椅加鐵罩吊鐵,打造出別具風格嘅小清新感覺,令人好Relax! 食美國菜,點可以唔嗌大大舊扒同Burger?「炭燒穀飼澳洲肉眼牛扒伴薯菜」($218),雖然嗌七成熟,但咬落非常Juicy,肉質細膩微帶炭燒香,配上大廚秘製Sauce,肉汁更豐。 「炭燒穀飼澳洲肉眼牛扒伴薯菜」($218) 而「炭燒美國安格斯牛肉漢堡配炸洋蔥圈」($118)係抵食之選,百零蚊一個安格斯牛肉Burger,再加埋香脆炸洋蔥圈,仲有酸瓜、橄欖解膩,成個Set咁上,最啱幾個Friend「些牙」! 「炭燒美國安格斯牛肉漢堡配炸洋蔥圈」($118) 如果多朋友一齊食飯,可以嗌一個「精選小食拼盤」($138),有齊炸雞翼、烤醋仔髀、炸芝士辣椒、意式蕃茄伴麵包同鮮蔬菜條,小食種類多,可以試晒店舖嘅小食,最啱貪心嘅大胃王,樣樣都可以試吓! 「精選小食拼盤」($138) 如果食咁多嘢都唔飽,要食番啲粥粉麵飯打底,呢個「美國藍蟹肉及意青瓜意大利飯配鮮蝦頭膏」($168)就最啱,以香濃嘅鮮蝦頭膏燴意大利飯,再配上清甜嘅美國藍蟹肉,充滿濃郁嘅海洋氣息。 「美國藍蟹肉及意青瓜意大利飯配鮮蝦頭膏」($168) 店舖食物嘅份量都幾大,如果想試多幾款美食,不防約多幾個朋友一齊食飯,咁就可以滿足你嘅貪心欲啦! 凍朱古力 凍檸檬茶 店內特別提供薄荷水,非常清新! 後記 除咗晚飯,小妹都試過同朋友食All Day Breakfast,感覺特別唔同,因為店舖有一面面嘅落地玻璃窗,食住Eggs Benedict,感受和暖嘅陽光照喺面上,感覺超寫意,下次大家都可以試吓! Eggs Benedict 藍蟹肉意粉 店名:Chef's Stage Kitchen 電話:2799 9880 地址:元朗西菁街23號富達廣場52-55號地舖 Facebook:https://www.facebook.com/hongkonggirl331/ Instagram:http://www.imgrum.net/user/hongkonggirl331/2549505907