韓國呢個地方真係百去不厭,無論係第一次去嘅Buddy,定係去過N次嘅地頭蟲,都對呢個地方產生莫名嘅情意結,明明踏出機場嘅一刻話唔會再嚟,但唔夠兩個月又執定行李出發,真係口不對心你最勁。韓國有好多餐廳,總令人食過返尋味,每次去都要食一次,小妹總結咗14間雜誌同旅遊書激推嘅開飯熱點,畀第一次去韓國嘅朋友參考,第N次去嘅朋友回味! 1)Isaac Isaac早餐店係遊客必到嘅三文治連鎖專賣店,只要見到一間有紅底白字嘅招牌小店,就知道係Isaac。店內有超過20幾種三文治提供, 包括辣雞肉三文治、牛排蛋三文治、蝦三文治、自製火排骨MVP三文治等,全部都係即叫即整,開放式嘅廚房令你對製作過程一目了然。阿豬媽會先將方包烘熱,沾上牛油,然後喺另一邊煎蛋,烘好嘅方包會塗上特製嘅沙律醬,再鋪上煎好嘅蛋、生菜(有時係椰菜)、醃小黃瓜、芝士、蕃茄汁等,再加上你揀選嘅主要材料,就大功告成喇!小妹最鍾意食辣雞肉三文治,原因係雞肉特別香辣多汁,再配合酥脆濃郁嘅牛油多士同爽口香甜嘅雜菜,令口感同層次都超級豐富,食極都唔會覺得太漏太Full。 辣雞肉三文治 點擊圖片放大 2)土俗村蔘雞湯 要數韓國最出名嘅參雞湯,一定係位於景福宮附近嘅土俗村蔘雞湯,呢間蔘雞湯專門店喺首爾歷史悠久,唔單止韓國前總統盧武鉉係座上客,亦吸引各地傳媒報導,所以係遊客食蔘雞湯嘅No.1餐廳。蔘雞湯嘅材料豐富,除咗優質糯米同四年高麗人蔘外,仲有栗子、胡桃、松子、銀杏等養生食材,將雞肉燉煮至融化到奶白色濃湯之中,再灑上蔥花、葵花籽同黑芝麻,香濃可口。小妹最鍾意佢附上一杯人蔘酒,雖然有啲偏哽,但如果喺寒冷嘅冬日飲一杯酒,成個人會即刻暖笠笠!另外,佢嘅醃蘿蔔同泡菜都超級好食,甜甜哋又唔會太酸同太辣,啱晒香港人口味。點擊圖片放大 +2 3)站著吃烤牛 擁有逾40年歷史嘅站著吃烤肉,以企喺度烤肉做Gimmick,獨沽一味賣牛肋骨,而舖頭入面嘅汽油鐵桶烤爐更加係Selling Point,幾個人圍住烤肉,風味無限!牛肋骨經特製醬油醃過,所以烤出嚟嘅肉汁鮮甜味美,雖然小店提供蔥蓉醬油同辣醬,但小妹覺得唔點都超好味,尤其配合尖青椒同蒜頭食,更添韓式風味!小妹同朋友去嘅時候仲可以帶埋叮叮飯(附近有便利店買兼叮埋)同生菜(當然要預先洗咗先帶去),想點食韓牛都得!點擊圖片放大 +3 4)全州中央會館 位於明洞嘅全州中央會館逾50年歷史,係石鍋拌飯嘅超級名店,招牌菜石鍋拌飯係食客必嗌,熱辣辣嘅石鍋入面有泡菜、生菜、紫椰菜、生雞蛋、菠菜、小魚乾、銀杏、火箭菜、鮮香菇、豬肉、紫菜、小黃瓜片等,蔬菜佔晒一半,食得健康又有營。小妹最鍾意底層嘅飯焦,香脆又可口,同港式嘅煲仔飯有異曲同工之妙。而拌飯嘅辣醬同麻油係店舖嘅秘密武器,完全保持地道嘅韓國風味。點擊圖片放大 5)吃休錢走年糕鍋(又名摩休敦納) 「吃休錢走」呢個名聽落有啲奇怪,但其實係首爾一間超級有名嘅年糕鍋店,意思係「吃飯、休息、付錢、走人」,取名非常直接,總店位於鐘路區嘅隱敝小巷,卻吸引好多遊客慕名而來。食客可以自由揀選鍾意嘅湯底同配料,湯底分別有芝士、蔬菜、 海鮮、部隊四種,配料另可以加韓式公仔麵、 雞蛋、火腿、煎餃、年糕等,大大鍋熱辣辣,味道甜甜哋又唔會太辣,超級Yummy!雖然個鍋本身有少少芝士,但小妹每次都會追加一份芝士,令鍋中材料都沾滿芝士,香濃又Creamy。而年糕同公仔麵亦係小妹最愛,皆因呢兩樣最索湯汁,食落超級惹味。點擊圖片放大 +2 6)HaiTaiRo蜂蜜薯片 蜂蜜味薯片近年喺韓國可謂大行其道,位於弘大購物區嘅HaiTaiRo就係以即炸蜂蜜薯片做賣點!包裝薯片食得多嘅小妹,即炸薯片真係第一次食,暖暖哋,比包裝薯片更新鮮香脆,仲要係蜂蜜牛油味,搞到小妹返到香港都仲心思思,以後都唔食包裝薯片喇! 點擊圖片放大 +3 7)忠武壽司 每次去明洞,都要食忠武壽司,皆因一口大小嘅飯卷同甜辣兼備嘅醃蘿卜及魷魚係食客最愛,包飯嘅紫菜由忠武市運到,飯卷每日即整即賣,軟熟嘅飯粒帶有麻油香,配合灑上幼鹽嘅紫菜,一件又一件,話咁快就食晒!呢度有個奇怪規定,就係飯卷食完要再買,但相對較貴嘅醃蘿卜同魷魚就可以無限添加,超級搞笑! 堂食會送上木魚熱湯,窩心又貼心!不過要提提大家,醃蘿卜同魷魚都幾辣,唔食得辣嘅朋友就要小心!點擊圖片放大 8)明洞街頭小食 每次去韓國,小妹都會揀住喺明洞,雖然酒店價錢有啲貴,但勝在交通方便,多嘢行又超多嘢食,如果想爭取時間行街Shopping,掃街就係最好選擇,買買吓衫肚餓,可以食碗炸醬麵同甜酸炸雞醫吓肚;行行吓攰,可以買個雞蛋糕歎吓,仲有紅石榴汁做飲品,炸香蕉同士多啤梨啫喱做甜品,街頭小食都有優勢架! 雞蛋糕 炸香蕉 紅石榴汁 9)姜虎東烤肉店 由韓國知名藝人姜虎東開設嘅烤肉連鎖店,最出名食濟州盛產嘅豬肉——五花肉,肉質醇厚,肥瘦適中,最地道食法係用紫蘇葉包住烤肉、蒜頭、洋蔥嚟食,烤爐邊位仲有附贈嘅烤蛋,又香嫩又滑溜。此外,高級韓牛都係小妹至愛,最鍾意嗌一個Set同朋友「些牙」,有原味雪花牛肉、原味牛排同原味牛胸腹肉(Combination Combo 2 ,W49900)。點擊圖片放大 +3 10) 柳家辣炒雞 柳家辣炒雞可謂首爾必嚐嘅美食之一,皆因匯聚多種食材精華嘅大鐵鍋內充滿住雞柳、椰菜、韓國年糕、鮮紅泡菜、蔥、芝士、拉麵、薯仔同八爪魚,再加上秘製辣醬快炒,香辣惹味,刺激味蕾。炒雞之前,店員會奉上圍裙, 避免辣炒雞排嘅醬汁濺到衫上,十分貼心!小妹最鍾意追加一份芝士,混合拉麵同韓國年糕一齊食,真係大滿足呀!!點擊圖片放大 +4 11)神仙雪濃湯 如果睇過韓劇《燦爛的遺產》嘅朋友,就一定識神仙雪濃湯,因為佢嘅拍攝地就係喺呢度。雪濃湯喺韓國料理中烹飪歷史最長,原名先農湯,係李氏朝鮮時期成宗親臨位於現在東大門區祭基洞的先農壇,賜宴百姓時發明。由於雪濃湯好似當時喺先農壇煮嘅湯,因此名為「先農湯」,後改名為「雪濃湯」。以澳洲全牛配合人蔘、紅棗等藥材經過十幾個鐘長時間熬煮,令牛骨中嘅味道滲出,變成奶白色嘅濃湯,再加少少蔥同鹽調味,韓國人鍾意將飯撈入去食,但小妹就鍾意一啖湯一啖飯,鮮甜美味又滋補。點擊圖片放大 12)廣藏市場 想體驗韓國最熱鬧嘅市井氣息,廣藏市場一定係首選,皆因呢度匯聚咗全韓國最出名嘅地道小食, 豬腳、綠豆煎餅、血腸、紫菜包飯、辣炒年糕、韓式粉絲、甜米漿... ...行一轉已經大飽口福!個人覺得綠豆煎餅真係麻麻哋,超級多油又飽肚,相反紫菜包飯、辣炒年糕等份量適中,味道又地道,小妹最鍾意喺度解決午餐,因為好似食自助餐咁,食完一檔又一檔,仲可以感受吓韓國地道嘅飲食文化,超正!點擊圖片放大 甜米漿 韓國血腸 五香豬腳 辣醬雞腳 韓式炒粉絲 紫菜包飯+辣炒年糕 13)橋村炸雞 《來自星星的你》入面,全知賢鍾意食炸雞嘅形象深入民心,令一眾港女有樣學樣,睇吓可唔可以搵到個好似「都教授」咁嘅癡情型男做男友。但如果食炸雞唔係遇上「都教授」金秀賢,而係李敏鎬呢?相信港女們一定更加瘋狂!由韓國型男李敏鎬代言嘅橋村炸雞,唔單止可以同李敏鎬(個紙板)合照,仲可以免費獲贈佢嘅海報,小妹唔鍾意李敏鎬,但小妹個朋友就超級興奮,真係無佢符... ...我都係食炸雞同飲啤酒算鳥。 點擊圖片放大 +2 14)鷺梁津水產市場 鷺梁津水產市場係全首爾最大嘅海鮮批發及零售市場,海鮮精可以喺度買到各式新鮮即捕嘅海鮮,例如韓國帝皇蟹、長腳蟹、龍蝦、鮑魚、青口、扇貝等,小妹最鍾意食長腳蟹,皆因價錢比香港平同新鮮,但係要小心言語不通畀人劏,建議唔好喺樓梯附近同門口幾檔買,因為價錢係天價,最好行入少少嘅檔位,相對較平同實惠。揀好海鮮可到2樓餐廳代為烹煮,不過通常你買緊,啲餐廳負責人已經喺附近Sell你,小妹通常揀巨富食堂,因為價錢合理同唔會換你海鮮。點擊圖片放大 +3 龍蝦刺身 龍蝦頭海鮮湯 清蒸帝皇蟹