喺香港食海鮮出名貴，食一隻韓國紅蟹或日本松葉蟹都起碼$300起跳，真係叫一眾蟹迷肉赤！！如果話畀大家知，每人$200就可以無限時任食紅蟹呢？你會唔會大嗌「好Ｘ抵呀」？點擊圖片放大 餐牌全韓文，唔做功課嘅寶寶就要靠自己喇!!! 位於首爾市永登浦區嘅Daege Jaldoeneun Jib就係主打紅蟹放題，或者你會問：「吓？會唔會好似香港放題咁啲嘢食Cheap Cheap架？」又或者問：「係咪魚毛啲Friend，蟹毛嚟架？」親身直擊嘅小妹可以好大聲話你知：「絕對唔係！！！」 魚缸入面全部都係紅蟹!!! 樓高三層嘅紅蟹專門店，一樓放置魚缸，二樓同三樓係用餐區，地方闊落之餘，座位都多，完全係想接多啲客，唔怕被食窮嘅表表者！呢度完全冇大陸人幫襯（至少小妹去嘅時候冇，可能仲係新，冇咩人知），而周圍都係韓國人，餐牌都係全韓文，早已做定功課嘅我，唔使睇菜單都已經知嗌W29,800（約港紙$200）嘅任食套餐。 第一Round得四隻，對於有啲腳斷咗，有啲Sad囉！！！ 雖然頭一Round啲蟹有啲甩咗腳，但蟹肉都係「實的的」，撐滿啲殼，仲爆晒膏（由於小妹掛住食，冇影到啲膏，不過小妹留意到之前有雜誌介紹過，大家可以睇吓，啲膏量係同雜誌介紹嘅一模一樣）！！！之後幾Round就好好多，冇甩手甩腳，全部都係完整嘅四至五隻！！！而且隻隻都差唔多有500至600g，蟹膏肥美，蟹肉又鮮甜，食到小妹舐舐脷，停唔到口！！！ 第二Round係完整5隻呀!!!!!!!原來佢係隨機撈，所以有辣有唔辣囉!!! 第二Round完成後，個桶已滿晒殼^^ 侍應清完桶之後，第三Round四隻繼續!!!! 不過大家要食完先可以再Refill，一嚟避免嘥嘢，二嚟啲蟹唔使放太耐變凍，影響味道，所以大家都係食幾多嗌幾多。同埋大家都唔使擔心上得慢，「柯打」完大概5分鐘就會Refill，加上佢唔限時，又唔會趕你走，可以慢慢歎！！！仲有六款前菜同海帶湯無限量供應，超級抵食！！！ 嗜蟹如我同朋友兩個人總共食咗13隻，小妹個人就KO 7隻半，簡直可以拍得住韓國男人！！！因為老闆話韓國女仔最多都係5隻到，而Oppa們就大概10隻！！！即是話我就嚟直逼男人數量了... ...除咗蟹，仲有蟹湯、蟹飯同其他海鮮嗌，不過價錢另計，但個人覺得，既然食得蟹放題，當然要留肚食到盡啦！食埋其他加錢嘢又唔抵又增加飽肚感，所以都係專攻蟹最抵！！ ＊＊＊＊後記＊＊＊＊ 前菜同海帶湯都係無限量供應，只係... ...碟蠶蛹就... ... 好核突但好好食 話說食蟹放題應該係最爆，點知佢前菜仲爆，竟然有蠶蛹食！！！！OMG！！！小妹去咁多次韓國都未見過／試過蠶蛹，望落真．係．好．核．突！不過小妹見啲韓國女仔好似當蝦米咁啪，搞到我都好想試。起初我夾起真係打晒冷震，加上聞落啲味又好怪，但最後都係咪埋眼食一粒，點知一食又覺得幾好味，非常香口，所以所有恐懼都係因為心魔，唔好因為咁而錯過一啲好嘢，核突嘢都可以好好味！！ 店名：Daege Jaldoeneun Jib 電話：+82(0)2-267-3397 地址：首爾市永登浦區永登浦4街98-12 營業時間：10:30 am – 2am 前往方法：永登浦站3號出口步行約5分鐘
