話說小妹同一般港女最大嘅分別，就係超級唔鍾意食法國菜，原因無他，首先就係太嘥時間，一餐飯食5、6個鐘，除非我真係得閒到可以玩手指，如果唔係，要我坐定定喺度，「得」正正喺度係絕對冇可能 ! 其次就係價錢太貴，或者你會話，又唔使你畀錢，男朋友畀咪得囉！好可惜小妹冇男朋友，單身如我只能夠食自己，就算真係有個男朋友，我都唔一定要佢畀，閒閒地千幾二千蚊一餐，教我如何忍心要佢咁大負擔？不過有間法國餐廳就試圖打破小妹以上所講嘅界限，其一，上菜速度絕對唔慢，總之嘢食搞掂就會送上嚟；其二，價錢超級親民，做男朋友一定唔會有負擔，單身人士亦都絕對可以負擔 ! 話說有位型男前排約我食法國菜，起初都有啲縮沙，但佢深知我唔鍾意法國菜，但又想企圖要我對法國菜改觀，所以憑三寸不爛之舌同自認為英俊外貌成功說服我，而我亦難逃型男（利申，係佢要脅我咁講）嘅熱烈「懇求」，應承試食 ! 隱身喺尖沙咀柯士甸路嘅Scarlett Café & Wine Bar，舖頭細細，原來屬於 Hotel G 集團，喺北京同曼谷已經有分店，店舖主打工業風，以型格十足嘅金屬、原木、鎢絲燈膽同水泥牆等元素作為設計概念，將咖啡店同酒吧合二為一，小妹非常鍾意呢個Concept，尤其係佢將下層劃分成酒吧，唔單止設有酒櫃、吧枱同高櫈，日頭仲係半露天酒吧，啱晒我呢啲鍾意同三五知己飲番杯嘅派對動物，再加上呢度位於僻靜小街，絕對唔會有醉酒客搭訕同搔擾 ! 下層全置高腳櫈，打造成酒吧。 至於上層就係主要用餐區，店舖打造成溫馨小酒館，可惜小妹同型男只係坐下層摸酒杯底談心，樓上都係留番下次同閨蜜一齊開大餐啦！ 近門口位置設有一排酒櫃 鎢絲燈甚有情調 其實餐廳主打平價火腿拼盤同Tapas，前者三百幾蚊就搞掂，而後者就可以揀三款、六款或九款，而且九款都只係$168，不過小妹同猛男兩個人都幾難KO呢幾味，加上又想試多啲嘢食，所以就嗌咗香草烤雞、法式鴨髀同意粉呀咁，但價錢同樣親民。 法式香草燒雞 $108 'Le Coquelet de ferme roti aux herbes de Provence法式香草燒雞 $108 （Roasted baby chicken , Proverncal herbs） 即叫即烤，一出爐就上枱，食落熱辣辣兼充滿香草味道，外皮鬆脆，內裡鮮嫩，感覺就好似真係去咗普羅旺斯度假歎烤雞一樣！ 法式油封鴨髀 $98 'Le Confit de Canard法式油封鴨髀 $98 （Duck leg confit） 係著名法國菜，鴨髀食落Juicy又肉質鮮嫩，配合酸酸甜甜嘅醬汁，完全冇油膩感。 海鮮意粉 $118 Scampi海鮮意粉 $118 （Pasta with creamy seafood sauce ） 味道同龍蝦汁意粉無異，不過不失。 長島冰茶 $80 Long Island Ice Tea 長島冰茶 $80 （Vodka , Gin , Rum , Tequila , Triple sec , Lime juice topped up with coke ） 我最愛嘅大人版冰茶，混合五種酒，飲飲吓會微醺嘅感覺，突然覺得食法國菜好美好，不過只限快版！ 同型男飽餐一頓後，感覺並冇令我對法國餐廳改觀，我反而更鍾意一啲僻靜、遠離繁囂嘅小酒館，或者生活太繁忙，人太追求名利同地位，有時畀自己一個喘息嘅機會，隱沒喺小巷中孤芳自賞，亦未嘗唔係一種享受。 店名：Scarlett Cafe & Wine Bar 電話：3565 6513 地址：尖沙咀柯士甸路2號地舖
