舊年風摩美、英、日嘅龍蝦包（ Lobster Roll）近期不斷襲港，令一眾龍蝦迷既驚又喜，終於唔使為個包越洋，實乃萬「迷」之福！不過要喺香港食呢個過江「龍」都真係幾頭痛，一就係價錢貴，打正旗號「來佬嘢」，再加上材料係龍蝦，每人起碼都要三、四舊，食完都有啲肉痛；二就係味道，做唔做到American Style呢？龍蝦夠唔夠新鮮呢？係咪用雪藏龍蝦呢？而位於銅鑼灣嘅Master Kama同位於中環嘅 Lobster Central，主打嘅就係價錢親民而又新鮮即製嘅龍蝦包，人均約$200就可以食到龍蝦包同龍蝦大餐，Are you kidding me？ 龍蝦匯（$398），右起：半隻烤蒜蓉牛油龍蝦、龍蝦包、薯條。 Master Kama每日都會將波士頓龍蝦從加拿大空運到港，以製作出新鮮美味嘅龍蝦包，雖然主打嘅係個包，但小妹覺得佢個龍蝦匯最特別，皆因套餐全部以龍蝦做主打，包括龍蝦包、半隻烤蒜蓉牛油龍蝦同龍蝦雜錦海鮮石鍋烏冬，$398二人前兼大堆頭製作，再加上一次過試齊唔同食法嘅龍蝦，相信好多龍蝦迷同小妹一樣都會無限心心眼！ 波士頓龍蝦以蒜蓉牛油烤焗，香氣四溢！ 龍蝦包塞滿龍蝦肉，超級結實！ 成個餐用盡一隻大Size嘅波士頓龍蝦，半隻以蒜蓉牛油嘅方式烤焗，食到啖啖肉嘅龍蝦之餘，亦可以食到原汁原味嘅龍蝦；至於另一半就會整龍蝦包，首先廚師會將龍蝦拆肉，混合番茜、蛋黃醬同檸檬汁等調校而成嘅特製醬汁，夾入經過烤脆嘅日本甜餐包，外面香脆，內裡軟甜，一個真係唔夠喉，只可惜仲有個石鍋烏冬同附送嘅薯條，如果唔係小妹一定Encore多一個龍蝦包！ 龍蝦雜錦海鮮石鍋烏冬 至於龍蝦雜錦海鮮烏冬就以熱辣辣嘅石鍋上，一放上枱就見到啲湯仲滾緊，湯底以用剩嘅龍蝦頭熬煮，不過個人覺得呢個烏冬有啲遜色，比起龍蝦包同烤龍蝦，龍蝦味相對冇咁香濃，但作為一個Ending都係唔錯嘅選擇，就好似每次打完邊爐都要淥個麵食咁，食完先至有滿足嘅感覺！ Master Magic Soda（$38） 藍色嘅花茶梳打一加檸檬汁就瞬間變成紫色！ 舖嘅飲品都好得意，藍色嘅花茶梳打（Master Magic Soda）內附一支試管，只要將試管入面嘅檸檬汁倒入花茶梳打，原本藍色嘅梳打會即刻變成迷人嘅紫色，果然夠Magic！ Homemade Grape Soda（$38）味道不過不失。 店名：Master Kama 電話：3421 2129 地址：銅鑼灣謝斐道500號維安商業大廈3樓 營業時間：星期日至四：12:00-22:00、星期五至六及公眾假期：12:00-23:00 ＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊＊ 如果你好趕時間，唔想花太多時間慢慢歎， Lobster Central會係一個唔錯嘅選擇，皆因佢係快餐嘅代表，客人可以喺一個鐘時間嘅Lunch Time外賣龍蝦包，亦可以喺店內食，不過由於店舖太細，加上龍蝦包熱潮正盛，想搵個位真係幾有難度！ 左起：龍蝦包（$138）、蟹肉包（$118）、松露薯條（$48） 每個龍蝦包會用上成隻達1磅重嘅龍蝦，都幾重手吓！ 小店以包做主打，龍蝦包當然係大熱，龍蝦每日都喺美國緬恩州新鮮運到，而且隻隻達1磅重，每個包會用晒成隻龍蝦，以達至啖啖肉嘅邪惡級程度！麵包係由本地嘅師傅製作，店主會先將麵包抹上牛油並烤至香脆金黃，再夾入經檸檬、蛋黃醬、西芹等輕輕調味嘅原隻龍蝦肉，大大舊龍蝦肉塞滿成個包，攞上手脹卜卜，超級真材實料！麵包經過烤焗，當然係香脆，但令人驚喜嘅係，龍蝦肉肉質彈牙，而且充滿海水鮮甜味，呢樣嘢真係值得一讚！再加上親民價$138，性價比超級高！ 除咗龍蝦包，仲有蝦肉包（Shrimp roll，$88）同蟹肉包（Crab roll ，$118），呢兩個可以話係龍蝦包嘅變湊，小妹覺得蝦肉冇乜特別，於是就叫一客蟹肉包，經過檸檬牛油調味嘅愛爾蘭麵包蟹箝肉塞滿成個包，而每個包嘅蟹肉又足足有120克之多，務求每啖都可以食到鮮甜嘅蟹肉！ 松露薯條混合咗松露鹽同松露油，可以點松露醬食。 食美式快餐又點可以冇薯條？松露薯條混合咗松露鹽同松露油，再點松露醬食，比起點茄汁食，呢個可以話係薯條界嘅豪華版！ 店名： Lobster Central 電話：35656725 地址：中環士丹利街50號地下E號舖 營業時間：星期一至日：11:00-20:00
